Norway tana goal khung tam ber Haaland

Erling Haaland chu Norway ram tana goal khung tam ber a ni ta der mai. Manchester City striker hian Slovenia 3-0 a an hneh ṭumin goal hnih a khung a, ram tana goal a khung belhkhawm chu goal 34 a tling ta chiah.

Goal khung thei bik Haaland hi kum 24 mi chauh a la ni a, tun hma lama record lo siam tawhtu Jorgen Juve chu a rawn khum, a kum a la naupan avangin ama record siam thar pawh ni nasa takin a sawhnghet ngei ang.

Haaland hian kum 2019 aṭang khan Norway tan a khel ṭan a, goal khung tam record siam tur hian match 36 chauh a mamawh. Record hmasa siamtu hian match 27 chhungin goal 33 a khung thung!

Juventus-a kha a tirah chuan striker a ni a, mahse a hnu lamah chuan tlarhnung laiah khelhtir a ni ta daih a, goal a khung tawh sa a belhchhah ta lo a ni, kum 1920 bawr lai daih tawh a nih avangin a mak danglam angreng hle - kum 90 a liam hnuah a record hi khum a ni chauh.

Ram tana goal khung tam record a siamna hi Haaland chuan tun hma lama a la tih ngai loh angin a lawm. Ball chu a jersey chhungah a thun a, naute hnute hne angin a kutzungpui a hneh bawk, a bialnu Isabel Haugseng Johansen nen an fa hmasa ber an beisei tih a puan chhuahna nia ngaih a ni.