Tour de Hmuifang : October 15 thleng inziahluh theih

Mizoram Cycling Association (MiCA) chuan Tourism Department nena ṭangkawpin Mizorama thirsakawr intlansiak huhang nei lian ber Tour de Hmuifang 2024 chu October 31, 2024 aṭangin ṭan a ni dawn.

Tun ṭum inelnaah hian category panga an awm Elite (Kum 19 chunglam), Masters (kum 35 chunglam), Junior (Kum 19 hnuailam), Road (Open) leh Women (Open) hmangin inelna a awm ang. Thlalaka QR Code hi scan-in inziahluh theih a ni.

October 1 aṭang khan inziahluh hun hi hawn a ni tawh a, tunah chuan discount hun a zo tawh bawk. Tunah chuan registration fee hi Rs 1000 a ni tawh a, October 15, Thawhlehni thleng inziahluh theih a ni.

Registration ti turte tan rider license siam a nih dawn avangin passport size tharlam, fiah felfai tak thehluh tur a ni, inrinlawk ngei tur a ni. Inziahluh rual hian MiCA Rider Licence fee Rs 50 pek tel ngei tur a ni a; T Shirt (Rs 650) leh chaw ei duh tan chaw ei man (Rs 350) duh tan pek tel nghal tur a ni bawk.

Tour de Hmuifang

Vawi 1-na October 2, 2021 khan Gandhi Jayanti denchhena neih a ni a, Mualpui Zero Point aṭanga Hmuifang thleng an intlansiak. District hrang hrang, Aizawl, Lunglei, Kolasib, Champhai, Serchhip leh Saitual aṭangin rider 72 an tel. Category pahnihah inelna a awm a, kum 35 hnuai lamah Mesak Vanlalvena, Sihfa khua (darkar 2:14) chu pakhatna niin kum 35 chunglamah Lallawmsanga, Mission Veng (darkar 2:35) chu pakhatna a ni thung.

Vawi 2-na November 18-19, 2022-ah Tour de Hmuifang vawi hnihna hi neih a ni a; Aizawl-Hmuifang leh Thenzawl-Hmuifang inkar, 100km a thui intlansiak. Elite Category-ah Mesak Vanlalvena (4:30:01) bawk pakhatna niin Master Category (88km)-ah David Rualzakhuma (4:34:27) leh Junior Category (88km)-ah Lalruatfela (4:21:58) te chu pakhatna an ni.

Vawi 3-na World Tourism Day 2023 denchhenin September 23, 2023-ah buatsaih a ni a, Junior, Elite, Master leh Road (Open) category bakah a vawi khat nan hmeichhe category (exhibition) hran buatsaih a ni bawk. Junior leh Masters category te hi Maubuang khawchhungah lutin, Ṭhiak khawchhungah lut lehin Hmuifangah an thleng a. Open (Road) hi Hmuifang kawngdung pangngaiah an tlan a, Elite hi Maubuang Damdiai atangin Changte-ah an chhuk a, Samlukhaiah lawnin Chamring lam aṭangin Hmuifang an lut thung.

Intlansiaknaah hian hming pe 64 zingah tlan zat mipa 54 leh hmeichhe panga an tel a, state pawn aṭangin mi pahnih an tel. Junior (kum 18 hnuai lam)-ah Vanlalruata, Tuirial pakhatna a ni a, Masters (kum 35 chin chunglam)-ah Peter Zohmingliana, Bungkawn chu pakhatna a ni thung. Open (Road Category)-ah Dr. Lalrinawma, Hunthar pakhatna a ni a, inelna hautak ber Elite category-ah Richard Zorinsanga, Thenzawl Field veng pakhatna a ni bawk.