Mizoram Police nge nge

LZ Juice MPL11-ah football mawina phochhuahin a awm a, Mizoram Police FC-in defensive game nghet ṭha tak khelin I League 2 khel tura inpettling Chanmari FC an hneh. Lalbiaksanga Colney hoten first leg-ah Chanmari hi 2-1 in an hneh a, second leg-ah goal hmuh tur awm tawh loin aggregate-ah Police 2-1 in an chak.

All India Police Meet, MPL leh I Day Football champion lai Mizoram Police-in MPL10 final-a an hneh tawh Chanmari FC an hneh nawn a. Santosh Trophy hnuhnung bera Mizoram semifinal thlenpuitu coach Lalsangzuala Hmar lakah NorthEast Olympic-a Mizoram silver medal lakpuitu BS-a Colney a chungnung.

Tum nghet nei Police

Mizoram Police coach BS-a Colney a tumah a chiang a, player siksawi lam a ngaihtuah lo. Defender ṭha mi Lalhmunmawia (Ahmuntea) thlak nan B. Sena aiah tawnhriat ngah lo Lalmuanfela a luhtir.

Mahse, Mamuana hi a chak ṭha a, thahrui a ngah a, coach BS-a'n thutlukna a siam ṭha takzet. Chanmari forward Lalkhawpuimawia'n (Mapuia) first half chiah a khelh chhanah pawh a ngaih theih.

An chhut nasa mah mah

First leg-ah Chanmari 2-1 in an chak lo a, an khelh chhiat vang lam ni loin set piece vang chauh a ni. Mahse, coach Sanga leh a thawhpuite an khel chhe ta viauah an inngai a ni chek ang chu, inkhel bul ṭantue an thlak hlawk.

Goalkeeper Zothanmawia a rawn kir a, hei chu rinlawk angah a ngaih theih. Mahse, tlarhnungah pawh Lalhmangaihsanga leh Sena Ralte te aiah Vanlalremruata leh Ephraim Lalremtluanga te an lut.

Malsawmzuala khawih chet a rem lo a, KC Malsawmsanga, Lalrokima leh Mapuia ten bul an ṭan nawn. Bul ṭantu zingah JH Remlala leh MS Dawngliana te an rawn tel a, Chanmariin player panga ngawt an thlak.

Police tan Man-a

MPL hnuhnung pahniha best goalkeeper F. Lalmuanawma thlak a harsa dawn a, mahse Armed Veng South tlangval R. Malsawmkima'n a thlak zo tlat. Man-a tia koh ṭhin keeper hian inkhelh ṭan deuh chiaha Sawmsanga goal khung tur ṭha takin a dang a, hei hi inkhel tidanglamtu a tih theih.

Sawmsanga hian Police midfielder MS-a ke aṭanga ball a chhuhsak hnuah kawh zetin goal-ah a pet a, goal tura ngaih ni hman mah se Man-a'n a dang. Semifinal inkhel pawimawh bikah goal a chhuah lo a, man of the match-ah an thlang.

Mapuia an dah ṭha

Police-in goal venhim an thlan miau avangin Chanmariin ball an chang tam a, I League 3 group stage-a khingpuite hneh vek thei team an ni bawk a, player-te an nung ṭha a, inkhel a tihhmuhnawm phah hle.

Chanmari game a rang a, mah se hun pawimawh an rilru a fim lo. Police erawhin rilru fim takin Chanmari an hmachhawn a, first leg ang thoin tawnhriat nei player H. Lalbiakthanga, Lalfakzuala, MS-a leh F. Lalrinpuia (Valpuia) te an pawimawh hle.

Tawnhriat nei player karah F. Lallawmkima leh Michael Lalbiaksanga te tlan theihna a pawimawh a, FC Lalhmunmawia hoin Police tlarhnungin an hna an thawk ṭha bawk. Chanmariin goal chance siam an harsat a, goal khung an châk luatah a hun hmain an pet nasa a, goal zawnah pet loin an pet over nasa.

Chanmari chhuanvawr Mapuia meuh pawh a che hlei thei lo a, chutihrualin corner kick-a ball an vawrhluh ṭumah erawh Kelkang pa hi a hlauhawm - a tlawh goal teuh hle. First half-ah Police-in an hna an thawk ṭha a, Chanmari team enkawltute an buai phah!

Vanduai nge tihsual?

Chanmariin goal an khung loh reng chuan hun tawp lamah ball vawrh a ṭul dawn tih an chhut pha lo nge, an striker lian ṭha ber Mapuia chu halftime-ah an la chhuak.

Mahse, Mapuia aia lut Moses Lalrinzuala a rawn nung ṭha a, Police tlarhnung tan buaina a tling. Moses-a'n ball a hmuh ṭhat tawk loh avangin a nun tur angin a nung tawk lo a, Chanmariin inkhel thunun chung siin Police keeper Mana-a tan hna an siam thei lo.

Chanmariin inkhela khaipa ber Malsawmzuala an lakchhuah hnuah Police-in chance nawr letna remchang an ngah phah. Tlarhnung leh tlarhma thlunzawmtu an awm ṭhat loh avangin goalkeeper T. Mawia'n ball a pet chhuak nasa bawk.

Hun tawp lamah erawh Chanmariin chance ṭha an nei a, Rokima ball petin goal ban a per a, chakna goal khung fo tawhtu Dawngtea'n hnai tak aṭangin a pet over. An chance hlah dan aṭanga thlirin Chanmari an vanduai tih theih dan awm bawk mah se final an thlen loh chhanah thutlukna siam sual tih phat rual a ni lo.

Fak phu Police

Final lut tura Chanmari an rin ṭhup laiin Police-in hliam vanga Ahmuntea, Muanawma, Rinzuala leh Sawmfela te an chhawr lo chungin final an lut. Lalbiaksanga Colney leh a hoten an thawhrim rah an hmu a, semifinal-a inkhel pahnih thlirin chak phu zawk an ni.

Semifinal hnuhnung zawkah pawh Police-in chance ṭha an insiam a; Fakzuala'n freekick aṭangin crossbar a pet per a, Police captain hi Chanmari captain Lalrinchhana Tochhawngin box chhungah titlu mah se penalty pek a ni lo. Police hi, ball-in Sawmsanga kut a per avanga penalty an beisei pek an ni lo a, chak lo ngat se chuan an referee thutluknaah an thinur khawp ang.

Hnehna an chan takah chuan Police-in final an thlir tawh dawn a, a zawna champion theihna hun ṭha bawhpelh an tum lo ang. Coach BS-a'n Police player tawnhriat nei ṭha leh kum naupang zawk civil player-te a rem khawm ṭha a, Police thuneitute lamin an thlawp ṭha bawk.