Aizawl FC-in final an thleng hram

LZ Juice MPL11-ah champion rinkai Aizawl FC-in semifinal-ah goal an chhuah lo a, final lut turin Sihphir Venghlun an hneh. I League club hian first leg-ah 2-0 in hnehna an chang a, second leg-ah 1-0 in an chak leh bawk.

Victor Lalbiakmawia hote hi aggregate-ah 3-0 in an chak mah se nuam sain final an thleng bik lo a, Sihphir Venghlunin an rum ṭhaih ve reng. Chutihrualin Sihphir Venghlunin goal an khung theih miau loh avangin harsatna lian tham erawh an tawk lo.

An inrem e

Aizawl FC-in final inpuahchahna atan an hmang ṭan a tih theih a, defence laiah tawnhriat nei ṭha pahnih Lalchhawnkima leh Lalruatthara te an inkawptir. Police an hmachhawn hun atan a pawimawh thei ang.

Chutihrualin goal khung tam ber Lalbiakdika bakah playmaker Samuel Lalmuanpuia te chu hliam vangin an khel thei lo a, an ṭhat dan berin an inrem thei lo.

Sihphir Venghlun pawhin player an siksawi a, hliam vangin midfielder pawimawh Lalbiakzuala an chhawr thei lo. Goal khung khawl Lalthanpuia (Tepuia) erawhin bul a ṭan a, chak ngei an tum.

A goal mawh

Sihphir Venghlunin goal an mamawh tawh avangin an venghim ringawt tawh lo a, hei vang hian inkhel ṭantirh lamah pawh chance a tam nghal.

AFC tan Lalhriatpuia'n goal chance a insiam a, Sihphir Venghlun tan Lalremruata pawhin hun ṭha a khung thei lo. Team nem zawka ngaih Sihphir Venghlunin Aizawl FC tlarhnung an tibuai fo a, goal erawh an khung thei lo.

First half injury time-ah Sihphir Venghlun tana khel ṭha ber Malsawmtluanga Pautu-in goal ban a pet per a, a vanduai - goal ngat se chuan Aizawl FC dinhmun a derthawng thei ang.

Second half-ah bench aṭanga lut Samuel Laldinthara'n vengtu a nei lo chungin crossbar chungah a pet over a, Sihphir Venghlun an vanduai zel. Sawma ball pass ṭha tak pawh Ricky Lalramnghaka'n engmah loah a chhuah. Tawnhriat nei ṭha Lalawmpuia pawhin a khung thei bik lo.

A tawpah Aizawl FC-in goal an khung ta zawk a, Augustine Lalrochana'n vei lamah Malsawmtluanga Hrahsel mawi zetin a bum a, angle zim tak aṭangin chakna goal a khung. Team ṭha zawk danglamna a lang a, Aizawl FC 1-0 in an chak.

Engtin zel?

Aizawl FC-in tun MPL-ah league winner nomawi an chawi tawh a, MPL champion nomawi chawi thei dinhmunah an ding. Tun season-ah team ṭha ber an ni a, player nei ṭha an nih bawk avangin champion rinkai an ni.

Mahse, I Day Football-ah pawh champion rinkai an ni tho a, an champion chuang lo. Victor Lalbiakmawia hote final an luh avangin an lawm ang a, chutihrualin an kuta nomawi a la awm miau loh avangin final atan uluk taka an inpuahchah chhunzawm a ṭul ang.