Vietnam lakah India tan Mizo an inlan kim

October 14, Inrinni tlai khan India chuan friendly match-ah Vietnam an hmachhawn a, 1-1 a an inhnehtawkna inkhelah hian Blue Tigers tan squad-a awm Mizo palite an inlan kim vek.

India tan hian Lallianzuala Chhangte leh Lalengmawia Ralte (Apuia) te chuan inkhel bul an ṭan a, Edmund Lalrindika leh Lalrinliana Hnamte te bench aṭangin an lut bawk.

Thiên Truong Stadium, Nam Dinh-a inkhelah mualneitu Vietnam lam hian Bui Vi Hao hmangin goal an khung hmasa zawk a, Blue Tigers hian Farukh Choudhary hmangin si phurh an sut.

Goal dang a lut tawh lo a, draw result-a lungawi zir chungin team pahnih an ṭin. Khualmuala inkhel an nih avangin India tan result ṭha, tia chhal theih a ni a, inkhelh zawhah Blue Tigers te hi India lam panin an lo haw nghal.

Chak tum Vietnam

India coach Manolo Marquez-a'n anni aia team ṭha zawk khualmualah an tum tih a chiang a, 4-2-3-1 hmangin fimkhur takin a team a rem - Vietnam lamin 3-4-3 an rawn hmang thung a, Blue Tigers lakah chak an tum tih a chiang.

Inkhel ṭantirh phat aṭangin Vietnam hian India an nawr nghal a, tlarhmaah Hoang Duc leh Nguyen Van Toan an hmuhnawn a, mahse, Hoang Duc chuan a chance neih duhawm goal-ah a chantir thei lo.

India an awm mai mai bik lo. Lianzuala siamsak ṭha zet chu Choudhary chuan a hlah a, hemi hnu lawk hian India defender Rahul Bheke chuan Vi Hao titluin penalty a chawi. Blue Tigers an hlauthawng a, mahse, mualneitu captain Que Ngoc Hai pet chu Gurpreet Singh Sandhu-a'n a dang tlat.

Penalty an dan hnu lawkah India tan Brandon Fernandes chuan chance nei ve leh mah se, goal-ah a chantir thei bik lo a, Vietnam lamin an khung ta nge nge - minute 38-naah Vi Hao chuan goal hmahruai a khung a, 1-0 in chawlhlawk an hmang.

India 'comeback'

Chawlhlawk hman a ni a, Blue Tigers-in thu ṭha an ngaithla. First half-a mual sir lama hun hmang tam zawk LZa chu a chhung lama tlan tam turin thurawn pek a ni a, Mumbai City captain hi Vietnam tlarhnung tan a hnawksak ṭhin.

Lunglei tlangval Lza leh Farukh ten goal khungna chance an hlah hnuin, minute 53-naah thil duhawm a thleng. Bengaluru midfielder Suresh Singh chuan ṭha zetin ball a thlawh lut a, hei hi Farukh chuan Vietnam keeper pet khumin, si phurh sutna goal a khung.

India-in goal an khung hnuah an phur sawt a, an beisei goal dang erawh an hlawh chhuak zui lo - LZa'n Farukh tan bawka a siam chu Chennaiyin forward hian goal-ah a chantir thei lo a, India tan uiawm a tling.

Manolo-a'n chak tumin Farukh, Fernandes leh LZa a la chhuak, an aiah attacking player rual tho Edmund Lalrindika, Liston Colaco leh Vikram Partap Singh a luhtir. Mahse, India-in goal an hlawh chhuak tawh lo a, 1-1 in an ṭin.

Lianzuala a lawm

Vietnam lakah an chak zo lo a, mahse, Asian football-a team ṭha pawl ni tura indinthar mek Vietnam laka an khelh danah Lallianzuala Chhangte a lawm.

Mumbai forward chuan, "Hneh thei kan niin ka hria a, bul ṭan ṭha lo mah ila, second half erawh kan khel ṭha takzet a ni. Kan chance neih ho kha ti goal ngat ila, result a danglam tur a ni a, hma kan sawn viau e," tiin Vanglaini a hrilh.

India tana a vawi 41 nana inlan Lianzuala chuan sawi zawmin, "First half-ah ka duh angin ball ka chang tam tawk lo a, mahse, chawlhlawk hman hnuah khan ka khel ṭha deuhin ka hria. Goal emaw assist emaw tal nei thei tur ka ni a, ka ui takzet," a ti.

Blue Tigers tan Lza hi tlarhmaah player hmuhnawm a la tling reng a, Apuia a khel ṭha takzet bawk - Mohun Bagan midfielder hian ball a keng ngam a, a nghet ṭha a, Vietnam player hmaah a zam lo.

Minute 69-naah Edmund-a luhtir a ni a, Inter Kashi forward hian minute nei tam lo mah se, hma a sawn zel chuan tlarhmaah India innghahna tlak ni turin theihna a nei tih a lang.

A vawi khat nan Terina

Chennaiyin FC midfielder Lalrinliana Hnamte (Terina) chu minute 89-naah luhtir niin, ram tana a match hmasa ber a khel a, Dungtlang/Chanmari tlangval chuan a tan mumang ram ang mai a nih thu Vanglaini a hrilh.

Terina chuan, "Ka inkhelh ṭantir aṭanga ka châk em em chu ram tana khelh ve phak hi a ni a, khelmuala lut tura ka inbuatsaih kha chu ka awm dan pawh sawi thiam harsa ka ti. 'Lalpa, ka lawm e,' ka ti tawp mai," tiin Vanglaini a hrilh.

East Bengal leh Mohun Bagan tan pawha khel tawh Terina chuan sawi chhunzawmin, "Hmun chan phak ve zel ka beisei a, mahse, Pathian thu thu a ni," a ti a, ram tana inkhelh phak chu a ngaihhlut thu a sawi.

Terina hi Mizo player zingah India tana inlan thei 16-na chiah a ni a, Inrinni zana India leh Vietnam inkhel hi Mizoram football tan chhinchhiah tlak a ni.