Joel Matip-a'n inkhelh a chawlhsan

Liverpool defender hlui Joel Matip chuan kum 33 mi lek ni chungin inkhelh a chawlhsan thu a puang a, season hman zawh tak ruala Anfield chhuahsantu hian club dang zawm loin inkhelh chawlhsan a thlang ta zawk a ni.

Bundesliga club Schalke 04 aṭanga inzir chhuak Matip hian a career chhung zawngin club pahnih chiah a nei hman a, kum 2016 khan Schalke hi chhuahsanin, Reds hi free transfer-in a zawm.

Liverpool-in free transfer-a an player lakluh fuh ber pawl ni zuiin, match 201 ngawt a khelhsak a, goal 11 khungin, assist vawi ruk a nei. Liverpool tan Premier League, FA Cup, League Cup, FA Community Shield, Champions League leh UEFA Super Cup-ah nomawi a chawi.

Hliamin a tlakbuak ve reng a, 2019-20 season-a Premier League nomawi an chawi pawh khan league match kua chiah hliam vangin a khel. Champions League 2019 final-a Tottenham Hotspur (2-0) an hneh ṭum khan Divock Origi goal khung tur a assist.

Schalke 04 tan DFB-Pokal leh DFL-Supercup-ah nomawi a chawi ve bawk a, season hman zawh takah khan hliam vangin match 14 bak a khel lo - Anfield a cham chhungin vawi 16 ngawt a inhliam hma a, season hmasa khan ACL hliam neiin, khelmual luh leh ai chuan chawlh a thlang ta.

Cameroon tan vawi 27 a inlan hman chauh tiha international football lo chawlhsan tawhtu Matip hi Reds a chhuahsan dawn khan Jurgen Klopp chuan, "A phu anga dah san a nih loh avanga eng teh uala ngai lo an awm a nih chuan Joel hi a ni ngei ang - keini erawhin kan dah sang hle," tiin a lo sawi tawh.