Ronaldo-a'n a hna ngai a thawk

Cristiano Ronaldo-a'n a hna ngai a thawk, kan tih chuan goal a khung leh tawh tihna a ni - Zirtawpni zan khan UEFA Nations League inkhelah Portugal chuan 3-1 in Poland an hneh a, he inkhelah hian Al Nassr forward hian goal a khung leh ta a ni.

Poland khelmuala inkhelah Portugal-in inkhel an thunun a, goal pawh an khung hma. Minute 26-naah Bernardo Silva chuan goal hmahruai khungin, Ronaldo hian minute 36-naah a belhchhah a, 2-0 a ni.

Kum 39 mi Ronaldo hian goal a khung hmain hnai set sawtah crossbar a pet per a, mahse, a vanduai reng lo. Rafael Leao-a shot-in post a per, a per lehlam chu a awmna tur takah lo awmin goal-ah a chantir.

Euro 2024-a goal khung lo Ronaldo tan Nations League match thuma goal thum a khungna chiah a ni a, minute 90 erawh a khel tluan lo. Liverpool forward Diogo Jota chuan minute 63-naah Manchester United player hlui hi a thlak.

Portugal hi hahdamin an chak mai dawn niin a lang hman a, mahse, minute 78-naah Piotr Zielinski chuan si phurh sut ṭhenin, mikhual team a tihlauthawng.

Mahse, hun tawp nan minute hnih chauh a awm tawh tihah Southampton defender Jan Bednarek a chesual a, Paris Saint-Germain left back Nuno Mendes cross chu an lamah a tilut palh a, 3-1 in Portugal an chak.

Portugal tan Ronaldo-a'n goal a khung a, Barcelona tana season duhawm tak hmangtu, tun season-a match 11-a goal 12 khung tawh, kum 36 mi Robert Lewandowski erawh Poland tan a nil a, an khelmualah a team a chakpui zo lo.

Nations League match thum an khelhah Portugal an la chak vek a, Thawhlehni zanah Scotland an lenchilh zui dawn. Poland erawh match khat chiah an la chak ve a, Thawhlehni zanah Croatia an hmachhawn zui dawn.