Pochettino hoin USA an chak nghal

Mauricio Pochettino enkawlna hnuaia an match hmasa berah USA an chak nghal a, friendly match-ah Panama chu 2-0 in an hneh - US tan hian AC Milan midfielder Yunus Musah leh PSV Eindhoven striker Ricardo Pepi ten goal khat ve ve an khung a, Panama lamin a chhanletna tur an nei lo.

Pochettino chuan, "Ni rei lotê training kan neih hnuah, kan ruahmanna leh inbuatsaihna te tihhlawhtlin tuma ka player-te khelh dan khan min tilawm hle. Kan khel ṭha takzet a, a hma aia ṭha zawk ni tura kan inbuatsaihna kawngah bul ṭan dan ṭha tak a ni," a ti.

Nipui laia Chelsea chhuahsantu Poch chuan, "Hmasawnna tur chu tam tak a la awm a, mahse, hei hi kum 2026-a ṭha taka kan khelh theihna tura bul ṭanna chauh a ni. Hnehna kan chan avangin ka lawm a, kan chak chuan siamṭhat ngaite siamṭhat a awlsam ṭhin," a ti.

USA hian World Cup 2026 chu Canada leh Mexico te nen an inthlen ṭawm dawn a, World Cup ṭha tak hmachhawn an duh avangin July thla khan Gregg Berhalter banin, coach langsar Poch an la lut.

Poch hian Panama lakah hian, Nottingham Forest aṭanga Crystal Palace-a loan-a khel, tun season-a la inlan lo goalkeeper Matt Turner a ring lui a, a tisual lo - ram tana vawi 46 inlan tawh keeper hian vawi hnih ngawt ṭha zeta dan a nei.