Sangliana'n Rinchhana bawhbeh a tum

Mizo palian inchai champion lai Lalsangliana'n a vawi thum nan Mizo Inchai Palian title humhim a tum a, amah chotu Lalrinchhana Sailo lakah mipui hmuh châk inbawhbeh thlentir a tum.

Kum 34 mi Sangliana chuan, "Ka inbuatsaihna a kal tluang chho a nih phawt chuan ka tum angin ka inlan theih ka ring a. Chutihrualin inhliam palh leh eng emaw thleng ve thei a ni a, thil awm dan tur sawi lawk theih a ni lo," a ti.

Sangliana hian Mizo inchaiah a tel tirh aṭangin a beih apiang a la hneh vek a, kum 2014 kha title a chuh hmasak ber niin champion lai Lalnunfela bawhbet zo lo mah se phu takin a hneh. Kum 2016-ah PB Lalnienga bawhbetin a vawi khat nan title a humhim a, kum hnih kal ta khan Fela nen inchai lehin inbawhbeh awm lo bawkin a hneh leh a ni.

Kum 10 a champion tawh chhungin vawi thum chiah title fight a awm a, a la hmachhawn ngai loh North Vanlaiphai pa chak Rinchhana nen December thlatir hian LPS Arena, Falkland-ah an innuai dawn.

Kum 2003 April 2 khan a vawi hnih nan champion ropui R. Vanlalduata'n amah chotu Saidingliana Sailo a hneh hram a, thawh sawm an inchai chhungin inbawhbeh a awm lo. An intawn hmasak zawkah boruak a lian a, Duata'n ṭum ruk a bawhbeh laiin Saidinga'n tute mahin an la bawhbeh loh hi a bawhbet ve bawk a, mahse, an inbeih nawn lehnain mit a tlung zo lovin an inveng nasa a, kum 15 chhung a beih apiang hneh vek chungin Duata a chawl zui ta a ni.

Hemi hnu aṭang hian Mizo Palian inchaiah ngam taka inbeih aiin thiamna hmanga inven a hluar a, a vawrtawp inbawhbeh awm mang lo a inchai tluang a awm tak fo avangin a hlutna pawh a tihniam.

Title Fight hnuhnung ber kum 2022 November 17 khan Dawrpui Multipurpose Centre-ah Sangliana hian 20-0-in Fela hneh mah se a bawhbet miah lo a, a hmuhnawm tawk lo tia sawiselnain a um zui hial.

Upper Republic chhuanvawr Sangliana chuan, "Lehlam an inven chuan inbawhbet a harsa em em a, a tuartu tan a tlawm thlak bawk avangin bawhbeh kher ka tum vak lo ṭhin bawk.

"Mahse, Mizo inchai tinung thar leh turin inbawhbeh hi a ṭul hle tih a hriat a, mipui hmuh châk ber a nih bawk si avangin ka tihpuitlin theih ngei ka ring," tiin a sawi.

December 9 aṭanga 11 chhungin LPS Arena, Falkland-ah Mizo Inchai title fight chi hrang paruk neih a ni dawn a, freestyle wrestling tihnun leh zual nan thlan bikten exhibition match an nei tel bawk ang.

Kum 29 mi Rinchhana'n Sangliana barakhaih turin a theihna a ring tawk a, chutih laiin dar hliamin a tihbuai avangin a hma lam hun tur sawi lawk harsa a ti a, dam ṭha taka a inpuahchah thei a nih chuan mipuiin champion thar an hmuh ngei a beisei.

August khan Lalremtluanga (Zobawk) leh Laldinthara (Zokhawthar) hneh ve vein a vawi khat nan Mizo Inchai Palian title chuh turin a tling a, a inbuatsaihnaah a dar ding lam tinain a la dam chiang lo.

Rinchhana chuan, "Tha ka pek nat deuh chuan ka banbulah hian nâ a la awm a, duh ang takin ka la hmang thei lo. Dam ṭha taka inpeih hman turin hun a la awm a, ka dinhmun tur erawh sawi lawk a harsa rih khawp mai.

"Ka duh anga ka inpeih hman a nih chuan chak theih ka inring a. A beih tawhte aia tawh khirh zawk ka nih ngei pawh ka ring a, a tan chet a awlsam bik lo khawp ang," a ti.