Saka inkhel thei rih lo

Bukayo Saka chuan a ke dinglam hliam vangin match a khel thei rih lo a, England squad chhuahsanin Arsenal lam a pan - Gunners hian a dinhmun an lo zirchiang dawn a ni.

Arsenal forward Saka hi Three Lions tan Nations League khel tura koh a ni a, an match hmasa zawka Greece an hmachhawn ṭumin inlan mah se, hliam vang hian minute rukna lekah thlak a ngai hial.

Kum 23 mi Saka hi England player pawimawh zinga mi a ni a, a hliam hi an ram tan chânna a tling. A dinhmun hi chiang taka tarlan la ni lo mah se, hliam na tak erawh niin a lang lo thung.

Gunners manager Mikel Arteta-a'n a ring em em a, a dam phawt chuan inkhel turin a thlang ziah tia sawi ngam a ni. Tun season Premier League match an khelh tawh chinah phei chuan a la inlan kim vek a ni.

North London club hian an captain Martin Odegaard chu hliam vangin an chân mek bawk a, Norway internatioal midfielder hi a dinhmun tak hriat theih a ni rih lo, hliam a neih belh nia sawi awm mah se, chanchinbu rintlak deuhte chuan an la tarlang lo thung.

Tun kar tawpah Premier League an khel chhunzawm leh tawh dawn, tun hnai season hnih chhunga champion teuh thei tak Arsenal hian Inrinni zanah Bournemouth an lenchilh dawn a ni.