Bielsa enkawl Uruguay an chak lo

Peru chuan a vawi khat nan South American World Cup 2026 qualifying-ah hnehna an chang, an hneh tak hi team ṭha Marcelo Bielsa enkawl Uruguay niin, 1-0 in an hneh.

Inrinni zing khan National Stadium of Peru-ah ram pahnih an intawng a, hun tawp dawnah mualneitu lam tan Miguel

Araujo chuan goal awmchhun a khung, goal luh hun hi hun tawp hma minute hnih chauh awm tawhah a ni a, mikhual lamin an sut hman tawh lo.

Player nei ṭha zawk Uruguay hian goal khung theihna remchang an hmuh ho an hlah nasa hle, Federico Valverde, Darwin Nunez leh Maximiliano Araujo ten remchang an nei vek a, mahse, Peru goalkeeper Pedro Gallese an paltlang thei lo.

Inkhel chawhnu lamah erawh Peru zawkin inkhel an thunun a, an phu ang ngeiin hun tawp dawnah goal an sual chhuak, an tan chuan point thum hlawh chhuah hi chanchin lawmawm bik a ni ngei ang.

Uruguay coach Bielsa chuan, "Player kan nei ṭha zawk a, a bik takin midfielder khatiang khawpa nei ṭha chunga goal kan nawr chhuak zo lo kha a pawi, a mawhphurtu chu keimah ka ni tih ka pawm," tiin an chak loh chhanah amah a inbel a ni.

Tun hnai khan Uruguay striker chawl ta Luis Suarez chuan an ram coach Bielsa hi na takin a bei, a beihna erawh Copa America 2024 an khelh lai boruak vang a ni thung a, an hlawhchham chhanah a puh.

Suarez hian an coach Bielsa chuan team chhungah inpumkhatna a tichhia tih a sawi a, player leh coaching staff mai bakah player ho inkarah pawh inlak hran duhna a thlen niin a sawi a ni.

Chanchinbu miten Suarez-a thusawi an vawrh darh a, tun ṭuma result ṭha lo an neih hnuah pawh Bielsa hian zawhna a dawn tam phah hle. Bielsa erawhin team tana ṭha ber tur anga a hriatin thutlukna a siam tih a sawi thung.

Uruguay Football Association president Ignacio Alonso pawhin an coach an thlawp thu sawiin, "Luis Suarez sawi pawh kha a dik ang, team chhungah hian eng emaw chu a awm ngei ang, a awm tur pawh a ni - a chhan chu boruak inthlak hun lai kan tawng mek a ni.

"Thil inthlak leh inlumlet a awm chuan hetiang thil hi chu a thleng thei. Tunah chuan Bielsa hian kan ṭhatna turin a bei mek a, a kaihhruaina hnuaiah World Cup 2026 pawh ṭha taka kan tlin ngei kan ring," a ti.

South American World Cup 2026 qualifying-ah Uruguay hian match kua an khelh tawh aṭangin point 15 hmuin pathumna an ni mek a, an chung chiaha awm pahnihna Colombia an phak lohna chu point khat chauh a ni, an inhlat lo hle.

Ram 10 inel zinga paruk chu World Cup 2026 atan an tling nghal dawn, pasarihna chuan playoff an khelh a ngai dawn a ni. World champion Argentina chuan point 19 hmuin hma an hruai mek a ni.