A tihsual tam tuartu Gauff

Chak thei tura dinhmun ṭha taka a din hnuah Coco Gauff a chak lo a, a khingpui Aryna Sabalenka chu huaisen takin a tho chhuak thung - Belarus star hian Wuhan Open final a thlen theih phah a ni.

Kum 20 mi Gauff hian Sabalenka lakah set a la hmasa a, set hnuhnung pahnihah erawh ama tihsual tam a tuar a, a tawpah 1-6, 6-4, 6-4 a chak loin a zinkawng a tawp.

Set khatna bikah Gauff hian double fault vawi thum a nei a, set pahnihna leh pathumnaah vawi kua ve ve a nei! Sabalenka laka double fault a neih belhkhawm hi vawi 21 a tling a, kum 2024 chhungin ani aia tisual nawn tam an awm lo hial a ni.

American star Gauff hian season a hman ṭhat loh avangin coach hmasa a ban a, tun hnaiah coach thar kaihhruaina hnuaiah harh tharna a chang, tun thlatir lam khan China Open nomawi pawh a chawi a, a zawna title lak a tumna erawh a hlawhtling thei ta rih lo.