No. 1 ni tlang tur Sinner

Jannik Sinner chuan mipa tennis world number 1 ni chungin kum tawp a hmang dawn tih a chiang ta - Italian tlangval hian Tomas Machac hneha Shanghai Masters final a luh chiah khan, midang tan ranking san lamah kumin chhungin um phak theih a ni dawn tawh lo tih a chiang ta chiah a ni.

Kum 23 mi Sinner hian tun season chhungin nomawi paruk a chawi tawh, heng zingah hian a Grand Slam title hmasa ber Australian Open leh hmanni maia a lak US Open nomawi pawh a tel.

Season tir lamah khan a zawnin match 16 chhung hnehna a chang a, inrintawkna a neih san phah hle - Inrinni tlaia Machac a hneh chiah khan kumina match 64 a chak tlinna a ni chiah bawk.

Number 1 ni chunga kum tawp hman chu a beisei lawk loh a nih thu sawiin Sinner chuan, "Kan hma hun hi tumah hian kan sawi thei lo, chuvangin world number 1 ni chunga kum tawp hman hin ka suangtuah phak loh a ni.

"Season bul kan ṭan fuh khan ka kawng thui takin min sialsak a, a tawpah a rah ka seng. Italian tennis tan chuan hun lawmawm a ni, keimah chauh ni loin midang pawhin kuminah hian kan ram an tihmingṭha hle," tiin a sawi.

Hmanni deuh khan Sinner hian damdawi hman phal loh chungchangah buaina a nei, a fihlim nia ngaih ni mah se World Anti-Doping Agency chuan Court of Arbitration for Sport hnenah chhui chiang turin an ti a, infiamna lama thubuai ngaihtuahtu sang ber CAS hian a la ngaihtuah nawn leh ang.

Nizan khan Sinner hian Novak Djokovic nen Sanghai Masters final an khel a, result kan hre hman lo. Italian tlangval hi a chak a nih chuan tennis a khelh hun chhunga ATP title 17 a lakna tur a ni chiah dawn a ni, a khingpui Djokovic erawhin nomawi a chawi a nih chuan ATP title 100 a nei tling thung dawn a ni.