Ronaldo a chiang chuang lo

Portugal-in hliam vanga inlan thei lo Cristiano Ronaldo tel loin Croatia chu 4-1 ngawtin an sawp a, zanin dar 12:15-a Sweden an hmachhawn hunah pawh Juventus forward hi a inlan theih a la rinawm chuang loh. 

Ronaldo tel loin Portugal hian Croatia lakah harsatna an nei lo a, an thiampuipa awm loh hlanin Joao Cancel, Diogo Jota, Joao Felix leh Andre Silva te chuan goal khung hna an thawk. 

Portugal boss Fernando Santos chuan, "A ṭhiante zingah pawh training a nei tawh a, a hma ai chuan zia tawhin a inhria. A ke zungpui na hi hliam na tak tia sawi tur a ni lo a, mahse inkhel tur chuan a dam chian phawt a ngai a ni," a ti. 

Ronaldo hi Sweden-a inkhel tur Portugal squad-ah hian la awm rengin a zin ve a, rin loh taka a inlan thei a nih chuan ram tana a goal 100-na khung thei dinhmunah a ding ang. 

Kum 35 mi forward hian ram tan match 164 khel tawhin goal 99-a khung tawh a, international football-a goal khung hnem lamah Iranian legend Ali Daei (109 goals) chiah phak loh a nei tawh. 

Ronaldo hian Croatia laka 4-1 a an chak lai inkhel chu stadium-ah a en a, hmai tuamna a vuah loh avangin stadium hnathawk ten a hmai tuam turin an hrilh nghe nghe -Portuguese forward hian hrilh hriat a nih hnuah thuawih takin a hmai a tuam zui a ni.