ISL hmun ruak pakhat a awm

East Bengal leh Shree Cement ten inremna an neih tak avanga Kolkata club-in Indian Super League an khelh ngei a beiseiawm laiin ISL enkawltu Football Sports Development Limited chuan Indian top flight league-ah hmun ruak pakhat a la awm thu an puang a, a duh tan ISL khel turin dilna thehluh theih a ni. 

FSDL-in lehkha an tihchhuahah chuan, "Indian Super League season sarihna, 2020-21 inkara khel duh tan hmun ruak pakhat hawn belh a ni e," an ti a, dilna thlentu club chu Delhi, Ludhiana, Ahmedabad, Kolkata, Silliguri leh Bhopal khawpui zinga a khawi emaw ber club hi an nih a ngai thung. 

ISL khel tura dilna hi September 14-ah soft copy thehluh hman tur a ni a, hard copy chu September 17 thlenga theh luh theih turin hun hawn a ni. ISL-ah hian team 10 an awm mek a, ATK Mohun Bagan, Mumbai City FC, Odisha FC, NorthEast United, Hyderabad FC, Bengaluru FC, Chennaiyin FC, FC Goa, Kerala Blasters leh Jamshedpur FC an ni. 

FSDL leh heng club 10 aiawhte hian tun season-a club 10 bak awm lo turin an lo rel tawh a, East Bengal lamin sum an ngah thar takah chuan hmun ruak hi an hawng leh niin a lang. 

Hetihlai hian East Bengal leh Shree Cement Limited aiawha dilna thlen tur hian Shree Cement Foundation chu din a ni a, Ministry of Corporate Affairs-ah an inziak lut thar a ni.