Wolves-in Lyon defender Marcal an lalut

Premier League club Wolverhampton Wanderers-in nipui transfer bazar-ah chanchin ngaihnawm an neih belh zel a, Champions League semifinal khel Lyon aṭangin Brazilian left back Fernando Marcal an lalut. 

Kum 31 mi defender hian English club tan kum hnih chhung khel turin contract a ziak a, a man zat hi pound maktaduai 1.78 a ni - season hman zawh takah khan Lyon tan inelna hrang hrangah match 25-a khel. 

Portuguese third division club Torreense aṭanga a European football zinkawng ṭanu Marcal hian season thum liam ta chhung kha Lyon tan a khel a, chona thar hmachhawn turin Premier League lam a pan ve leh ta. 

Season hman zawh taka Europa League quarterfinal khel Wolves executive chairman Jeff Shi chuan, "Top flight football-ah match 280 chuang khelin Champions League thlengin a khel tawh a, Marcal hian kan team naupang tak tan a tawnhriat hi a hman ṭangkai ka beisei," a ti. 

Wolves hian Portuguese rawlthar duhawm Fabio Silva chu an club player manto ber ni turin pound maktaduai 35.6-in an lo lei tawh bawk a, transfer bazar-ah player la melh zel an tum bawk - midfielder leh Tottenham Hotspur lama an kaltir tak right back Matt Doherty thlaktu tur an zawng mek.