Police player an lang tlem mah mah - Police captain

Mizoram Police-in kum zawnin MPL final an lut a, chutihrualin mimal lawmman dawng thei tur chhawpchhuah zingah player pathum chiah an lang.

Police captain Lalfakzuala chuan, "Kei chu season tir lam ka khelh loh avangin semifinal-ah khel ṭha mah ila, ka tel lo hi ka hrethiam. Chutihrualin Police player an lang tlem erawh mak ka ti. Defender khel ṭha Ruatpuia leh forward che ṭha Lawma te hi chu lang se ka ti," tiin Vanglaini a hrilh.

Aizawl FC hmaah right back Lalruatpuia leh forward F. Lallawmkima te theihna hriat a châkawm a, player pahnih hian en an hlawh phah sawt ang.

Chanmari laka freekick mawi zeta khungtu Fakzuala chuan sawi chhunzawmin, "Final a nih avangin ka buai lo a, mipui an tam hian inkhelh a nuam zawk. Aizawl FC nena kan inkhel turah hian pressure kan nei lo a, hnehna chan ngei kan tum ang," tiin a sawi.

Zaninah hian mimal lawmman hrang hrang dawng puanchhuah a ni dawn. Kuminah hian emerging player thlan a ni dawn a; season dang ang thoin best player leh top scorer bakah best goalkeeper, best defender, best midfielder leh best forward te thlan a ni dawn a, ṭum dang ang thoin man of the match thlan a ni dawn bawk.