Mizo mipuiin football an hlut a ṭul - Aizawl FC captain

Aizawl FC captain Lalchhawnkima chuan a vawi khat nan MPL final a khel dawn a, I League club champion pui a tum dawn. Champhai Kanan pa Kimkima hi best defender nominee-ah a lang.

ISL club Delhi Dynamos bakah India club lar Mohun Bagan tana khel tawh Kimkima chuan, "MPL hi inelna ṭantirh aṭang khan ka ngaihlu a, final kan khel tur pawh hi ka lawm takzet. Champion ngei turin theihtawp kan chhuah ang," tiin a sawi.

Tualchhung football chungchang sawi zuiin Aizawl FC captain chuan, "Kolkata leh Kerala te pawhin league ṭha tak an nei a, mahse MPL aiin player an ṭha bik chuang lo. Chutihrualin mipuiin an hlut sak a, entu 1000 chuang hi chu an awm ve reng. Mizorama league sang ber entu awm mang loa season tluan kan khel hi chu football hmasawnna atan a ṭha lo.

"Player-te hian ṭawiawmtu kan mamawh a, entu an tam chuan hmasawn pawh a awl. Final-ah pawh entu ṭhahnem tak awm se ka duh a, keini lamin football hmuhnawm chhawpchhuah kan tum ang," tiin a sawi.