Djokovic hnehin Sinner a champion

Jannik Sinner chuan mipa tennis world number 1 ni tlak a nihzia a takin a lantir - Pathianni zana khelh zawh tak Rolex Shanghai Masters hmawr bawknaah Novak Djokovic hnehin a champion.

China rama inelna neihah, seeded pakhatna Sinner hian Djokovic hi 7-6 (7-4), 6-3 in a hneh a, tun season chhungin nomawi paruk a chawi tling ta. Andy Murray khan 2016 khan title pakua a la, ani hnuah Sinner hi kum khat chhunga nomawi paruk aia tam chawi leh thei a ni ta chiah.

A hautak

Novak Djokovic meuh hmachhawn chu a awlsam lo ang tih thil chiangsa a ni a, mahse Italian tlangval hi a tir aṭangin nghet takin a ding tlang thei - a service na leh fuh thei tak mai chu a dinchanpui ni pawhin a lang.

Set khatnaah service inchhuhsak theihna remchang an nei lo - tie break an khel chhunzawm. Kum 23 mi Sinner a chefuh ta zawk a, 4-0 a hma hruaiin a dinhmun a sawhnghet, a hnuah Djokovic hian 5-3 nih pui leh mah se a dang zo ta bik lo.

Tawnhriat nei ṭha zawk Djokovic hi set hnihnaah a chesual, ni danga a tihsual tam loh tak 'backhand volley' a sual leh zauh ṭhin a, a service vawi khat a hloh chu chak loh pui tham a ni tlat, a ṭha pahnih inkhelah chuan service vawi khat hloh a pawi thui.

Sinner hian mahni inveng taka khel Djokovic a nawr thiam a, a khingpuiin na taka a rawn nawr pawhin a chiai duh chuang lo. Tennis season kal laia khel ṭha tluang ber a ni a, a phu ang ngeiin a chung bera awm chungin kum tawp a hmang ang.

Sinner thu leh hla

Djokovic leh Sinner te hi vawi riat an intawng tling ta chiah a, ṭum li ve ve an chak. Sinner chuan, "Novak nena inkhelh kher hi chu engtik lai mahin a awlsam ngai lo a, chonan hautak berte zinga mi a ni ziah, ṭhat lohna lai nei lo player a nih avangin a awlsam thei lo.

"Nawr buan buan ni ila chuan ka talbuai dawn tih ka hria, chuvangin dawhthei takin ka vanneih hun kha ka nghak ṭhin a, a tawpah chuan a lo thleng dik thei ta a ni. Set khatna tie break ka khelh ṭhat em avangin inrintawkna ka neih belh bawk," tiin a sawi.

Italian tlangval Sinner hian kuminah match 71 a khel tling tawh, heng zinga 65 zetah hian hnehna a chang thei a ni. Nomawi a chawi zingah Australian Open leh US Open title a tel a, a kum a la naupan avangin hmabak thui tak a la nei dawn niin a lang.

Chutihrualin, Sinner hian khelmual pawn lamah buaina pakhat a nei mek. Damdawi hman phal loh chungchangah, infiamna lama thubuai ngaihtuahtu sang ber Court of Arbitration for Sport (CAS) chuan a chungchang thu a ngaihtuah ṭha leh dawn a ni.

Title 100 rih lo

Novak Djokovic kha champion ni se la chuan, tennis a khelh hun chhunga nomawi 100-na a chawi chiah ang. Mahse, mellung hlu bik a phun theihna turah Sinner a lo ding khawng tlat mai si a, tournament dang a nghah leh rih a ngai ta zawk.

Serbian star Djokovic chuan, "Engtik niah emaw chuan ka la thlen theih ngei ka beisei," a ti. Tennis player zingah Jimmy Connors (109 titles) leh Roger Federer (103) te chauh hi nomawi 100 chawi tling thei an ni a, an huangah Novak a lut ve thei ṭep.

Tun season chhungin Djokovic a che ṭha lem lo, mahse Paris Olympic gold medal chu an ram tan a vaw chhuak - Olympic champion nih hi a title lak tawh dangte ai pawha a ngaihhlut thu a sawi hial a, a tan kum ṭha tia chhiar theih a ni tho ang.

Aisa khawmualpuiah inelna an zo fel a, tunah chuan Europe lam an hawi leh rih ang. ATP Finals hmain inelna langsar ṭhenkhat - Swiss Indoors, Vienna Open leh Paris Masters te khelh hmabak an la nei, title lak theih a la awm nual dawn a ni.