Mac Allister a inkhelh theih a rinawm

Argentina midfielder Alexis Mac Allister chuan team training pangngai a zawm thei tawh - Nilaini zing dar 5:30 a Argentina leh Bolivia ten World Cup 2026 qualifier an khelh hunah bul a ṭan theih a rinawm.

World champion Argentina hi an match hmasa zawkah Venezuela nen 1-1 in an inhnehtawk - thlipui leh ruah sur nasain a nghawng a, khelmualah tui a tlin tam avangin coach Lionel Scaloni chuan inkhelh a harsat thu a sawi.

Venezuela an hmachhawn ṭum khan Mac Allister hi a inlan ve lo. A khel bawr na vangin training pangngai a nei har a, mimal chuan inbuatsaihna a nei tho. Tunah erawh Reds midfielder hi a hliam a dam tawh a, inkhel turin a inpeih leh tawh hle.

Brazil pawh Nilaini zing dar 6:15-ah an inlan dawn. World champion vawi nga ni tawh hian Neymar tel loin goal khung an harsat ṭhin a, an mikhual Peru hi table hnuai lama talbuai lai an nih avangin Brazil tan point thum hmuh theihna remchang a ni ang.