Finland hnehtu England an tho

Greece laka an tlawm hnuah England an insiamṭha nghal a, Pathianni zan khan UEFA Nations League inkhelah Finland chu 3-1 in an hneh - Jack Grealish, Trent Alexander-Arnold leh Declan Rice ten goal khat ṭheuh an khung a, Finland tana Arttu Hoskonen goal khungin awmzia a nei phak lo.

England hi season hmasa Nations League-a an chet ṭhat loh avangin League B lamah an relegate a, Group 2-ah an awm - Greece an hmachhawn hma khan match hnihah vawi hnih an chak a, Greece laka an tlawm hnuin an chak ve leh ta.

Group 2 inkhel dangah Greece hian 2-0 in Ireland an hneh a, captain Tasos Bakasetas leh Petros Mantalos ten goal khat ve ve an khung - Ireland hian a chhanletna tur an nei lo a, nuamsain Greece an chak.

Greece hi match li an khelh tawhah la chak vekin Group 2-ah hmahruaitu an ni a, season thara League A khel turin beiseina a sang ta hle. Group hmahruaitu hi League A khel turin an tling dawn a ni.

England dang

Three Lions-in Greece lakah an khel chhe takzet a, coach lailawk Lee Carsley-a'n dem a hlawh. English manager hian Finland lakah huaisen takin thutlukna a siam a, Greece laka tlawm aṭangin player paruk ngawt a thlak danglam.

Gareth Southgate-a hnuaia bul ṭan kumhlun, Everton goalkeeper Jordan Pickford chu bench lamah dahin, Dean Henderson chu bul a ṭantir a, mahse, Crystal Palace keeper hian a ṭhat leh ṭhat loh fiah turin hna a nei ngah tawk lo.

Greece laka bul a ṭan loh hnua bul ṭantir Jack Grealish-a'n Three Lions tana bul ṭan a phu tih a pholang a, minute 18-naah Angel Gomes-a ball pek ṭha tak chu goal hmahruai ni turing a khung a, mualneitu Finland mipui an ngawi.

Finland hian 1-0 a nih lai hian si phurh sutna remchang an nei a, mahse, FC Augsburg player Fredrik Jensen chuan hnai set sawtah a pet over - first half-ah chance ṭha zet a hlah bawk a, Finland player-ten an ui vawng vawng ang.

Arnold a 'cial

Carsley-a'n Liverpool right back Alexander-Arnold chu left back-ah a hmang a, a tichhe lo - England squad-a 'position' hrang hranga enchhin hlawh tak Arnold danglamna chu a ball pet thiamna hi a ni a, minute 74-naah a special-na hi min hmuhtir.

Arnold hian minute 74-naah, yard 25 vela hla aṭangin freekick mawi lutuk a chhuih lut a, Finland keeper Lukas Hradecky tan tih theih dang a awm lo. Goal khung harsat England-in 2-0 in hma an hruai.

Minute 10 a liam a, England bawkin goal an khung nawn - Arsenal midfielder chhuanvawr Declan Rice chuan hnai set sawt aṭangin an goal thumna a khung a, khualmuala inkhel ni mah se, chak tur a chiang tawh, tiin a sawi theih.

Hun tawp nan minute thum chauh a awm tawh tihah Finland hian Hoskonen chuan si phurh a sut ṭhen a, mahse, kum 27 mi centre back-in goal a khung chiah hian hun a tam tawk tawh lo a, Finland an tlawm.