England-in world class coach an mamawh - Carsley

Lee Carsley chuan England-in world class coach an mamawh thu a sawi a, Three Lions manager lailawk hi amah insawi bang duh chiah lo mah se, a ngheta England enkawl erawh a inbeisei chiah lo niin a lang.

Carsley chuan, "Ka sawi fo ṭhin a, kei chu match ruk chhung team kaihruai tura ruat ka ni a, ka lawm tawk em em a ni. England coach nih hi chawimawina a tling a, nuam pawh ka ti hle - Greece laka kan tlawm erawh nuam ka ti lo a, tlawm hi ka hrethiam lo.

"Mi tinin duhdan leh ngaihdan kan nei a, kei chu a laiah ka ding a, ka chunga thuneituten ka laka an beisei min hrilh chiang hle. England enkawl tur hi chuan world class coach, nomawi chawi tawh an ngai a, kei chu chutiang ni tura inbuatsaih mek chauh ka ni," a ti.

England boss Gareth Southgate chu July thla khan Three Lions coach aṭangin a bang a, a hmun ruak luah tur an zawn chhung atan Carsley hi coach-ah ruat a ni - November-a Nations League match hnih an khelh leh hun thlengin England coach a ni ang.

Carsley chuan, "Ka thil sawi avang hian England coach nghet ka ni lo ang, ka tihna a ni lo. Ka sawi tum ber chu Three Lions enkawl hi football khawvela hna sang ber pawl a ni, tih hi a ni. Kan player neihte hi en ula, nomawi chawina chance kan nei sang takzet a, chu chu ka sawi tum ber a ni," a ti a, top coach kaihhruaina hnuaiah England an champion theih a beisei.

England Under-21 boss Carsley chuan sawi zawmin, "England enkawl hi world class hna a ni a, football khawvela hna ṭha ber pawl a ni. He hna thawktu chu coach ṭha tak a ni ngei dawn - he hna ka thawk hi ka lawm a, kan pute pawhin min ring hlein ka hria," a ti a, England FA technical director John McDermott nen inbe reng mah se, Southgate thlaktu tur coach chungchang engmah a zawh loh thu a sawi bawk.