Lamine Yamal a inkhel thei dawn lo

Spain forward Lamine Yamal chu a tihrawl na vangin a chawlh rih a ngai dawn a, zanin dar 12:15-a Spain leh Serbia ten UEFA Nations League Group A4 match an khelh hunah a inlan ve thei lo ang.

European champion hian an match hmasa zawkah Denmark chu 1-0 in an hneh, an chak ṭum hian kum 17 mi Yamal hi hun tawp dawnah thlak a ni, hliam na tak ni lo mah se a zual zel loh nan a chawl rih dawn a ni.

Spanish Football Federation (RFEF) chuan thuchhuah siamin, "A hliam hi endik a ni a, na leh hlauhawm tak chu a ni hran lo. Mahse, a hriselna leh a hma hun ngaihtuah a ngai, chuvangin Serbia hmachhawn tur zingah a tel lo ang," an ti.

Spain coach Luis De la Fuente chuan Denmark nen an inkhelh zawh khan, a player-te chuan venhim an mamawh tih a lo sawi tawh, a bik takin player naupang Yamal chuan tharuma beih a tawk nasa niin a lo sawi tawh bawk.

Euro champion an nih theih nan khan Yamal hian a thawh hlawk hle a, a kum la naupang deuh mah se khelmual chhungah a puitling tawh hle - Barcelona tan pawh a vul mek, a club tan hian tun season inelna hrang hrangah match 11 aṭangin goal nga a khung tawhin a ṭhiante khung tur vawi nga tho a siamsak tawh bawk a ni.

De la Fuente chuan, "Mual ding lam aṭangin Lamine hian hlauhawm tam tak a rawn siam chhuak ṭhin a, kan khingpuite khan dan tumin an theihtawp an chhuah tih pawh ka hria, mahse tharum hmanga inbeihna a tam chuan hliam a hlauhawm.

"Referee khan hetiang hunah chuan player thiam leh an tum rawn bikte chu an veng turah ka ngai, inkhel an thunun tur a ni," a ti a, an khingpui Denmark lamin a naute an dim tawk lo deuh niah a ngai a ni.