Suarez thusawiin min nghawng - Bielsa

Uruguay manager Marcelo Bielsa chuan tun hnaia Luis Suarez thusawi chuan a nghawng tih a sawi a, a naute a khelhtir danah nghawng nei lem lo mah se a thuneihna lai ṭhenkhat chu a nghawng ngei tih a sawi.

Suarez hian September thla khan ram tana inkhelh a chawlhsan, tun hnai khan an coach Bielsa chuchang a sawi chhuak a, team chhungah ho hran bik a neih thu leh team inpumkhatna a tichhia tiin a puh a, senior player ṭhenkhatin inkhelh an chawlhsan chhan niin a sawi bawk.

Bielsa chuan, "Thil lo thlengte ka hria a, zawhna ka dawn zui hnem avangin ngaihthah ngawt theih pawh a ni lem lo. Chutihrualin team tana ṭha ber tur nia ka hriat angin hma ka la, kan kalphung erawh chu a danglam phah chuang lem lo.

"Team pawn lam boruak ngaihtuah hman kan ni lo a, kan hna pawh a ni hran lo. Engtin nge World Cup qualifier hi ṭha taka kan khelh zel theih ang tih chu kan ngaihtuah zawk tur a ni ang.

"Thu lo thang vel khan ka thuneihna ṭhenkhat chu a nghawng pawh a ni mai thei, kan kalphung erawh a danglam phah lo ang a, a ṭha lo zawnga nghawng a neih loh ka beisei," a ti. Uruguay FA lam chuan an coach Bielsa hi an rintawk thu an lo sawi tawh a ni.

Bielsa hi English club Leeds United chuan kum 2022 February thla khan an ban a, kum 2023 May thla khan Uruguay team hi a enkawl ṭan - tunah hian 2026 World Cup atan team nghet tak din tumin hma an la mek.

Uruguay hian Nilaini zing dar 5:00 hian Ecuador an hmachhawn leh ang.