A vawi thum nan Sabalenka a champion

Aryna Sabalenka chuan a vawi thum nan Wuhan Open nomawi a chawi a, hetiang tithei hmasa ber a ni - nomawi chawi tur hian inkhel inhnehtawk takah Zheng Qinwen a hneh.

Pathianni tlai khan Centre Court-ah final khelh niin, seeded pakhatna Sabalenka hian tualchhung nula Zheng hi 6-3, 5-7, 6-3 in a hneh hram. Wuhan Open bikah hian match a khelh tawh zawng zawngah hnehna a la chang kim vek.

Kum 26 mi Sabalenka chuan, "He hmun hi ka tan chuan in ang mai a ni a, tualchhung mi ka hmachhawn chung pawhin thlawptu ka nei ṭha takzet bawk a, ka tan chuan hmun nuam tak a ni chiang hle.

"Zheng kha player ṭha tak a ni, hmachhawn pawh a harsa taket. Tun anga a khel zel thei a nih ngat chuan final dang pawh a la hmachhawn nualin ka ring a ni, theihna sang tak a nei," tiin a sawi.

Zheng hi Paris Olympic champion kha a ni a, theihna a nei sang tih chu a chiang. Tunah chuan WTA 1000 final a lut leh thei a ni a, amaherawhchu a hmaah Sabalenka kher a din avangin kawng a harsa, vawi li an intawn tawhah a chak lo zawkah a ṭang vek.

Belarusian nula Sabalenka erawhin kawng dik a zawh chho mek zel - Wuhan Open a match hnuhnung 17 tehmeuhah hnehna a chang vek, tun hma lama chak zawn rei record lo siam tawhtu Petra Kvitova a khum.

Tun season chhungin Sabalenka hian Austrlian Open leh US Open nomawi a chawi bawk a, season tawp hmain title dang a lak belh a nih pawhin a mak lo ang - WTA Finals atan pawh rinkai a ni ang.