MPL11-ah Aizawl FC-in mellung thar an phun thei ang em?

LZ Juice MPL11-ah Aizawl FC-in hneh loh an la tawng lo a, MPL season khata league round-a hneh loh tawng lo hmasa ber an ni. I League club hian hneh loh tawng loa nomawi chawi theihna hun ṭha an nei a, final-a Mizoram Police an hneh thei a nih chuan MPL history-a mellung pawimawh tak an phun thei ang.

Victor Lalbiakmawia kaihhruai Aizawl FC hi tun season-ah vawi li an khingpui an inhnehtawkpui tih loh chu an chak vek. Chanmari nen ṭum hnih an inhnehtawk bakah Chawnpui FC leh Ramhlun Athletic nen vawi khat ve ve an inhnehtawk.

Final-a an hmachhawn tur Mizoram Police pawh hi league round-ah vawi hnih an hneh tawh a, chutihrualin I Day Football final-ah an hneh lo thung. AFC coach Victor-a chuan, "Chanmari FC leh Mizoram Police inkarah duh thlang thei ila, Police kan thlang ang. I Day Football final-a kan hneh loh hi hneh let ngei kan duh," tiin Vanglaini a hrilh.

MPL vawi 11 khelh tawhah inelna thunun tak tak an awm tawh a, H. Vanlalthanga kaihhruai Chanmari FC leh K. Malsawmkima kaihhruai Aizawl FC pawh kha league round-ah vawi khat ve ve an chak lo. Chutiang bawkin Lalsangzuala Hmar kaihhruai Chhinga Vengin season khata nomawi chawi theih zawng zawng chawi mah se league round-ah hneh loh an tawng tho.

Standly Rozario kaihhruai Aizawl FC pawhin hneh loh an tawng tho. Mizo coach Victor hote tan tun season hi hneh loh nei loa champion theihna hun ṭha a ni a, chutihrualin Mizoram Police an hneh lo nawn a nih erawh chuan an rilru na thawi dam a har dawn.

I Day Football-ah Aizawl FC-in hliam an tuar tawh a, MPL-a hliam an tuar nawn a nih chuan I League an khelh tur thlengin inrintawkna an hloh thei ang. Hei vang hian Victor-a hote tan MPL nomawi chawi hi a pawimawh takzet.

Aizawl FC hian MPL nomawi vawi li an chawi tawh a, Mala hnuaiah MPL3-ah a vawi khat nan an champion. Hemi hnua champion puitute chu hnam dang vek an ni a, MPL4-ah Standly Rozario hoin nomawi an chawi a, MPL7 leh MPL8-ah Gift Raikhan leh Standly Rozario hoin an champion leh bawk. Hei chauh hi a ni lo a, tun ṭuma an champion a nih chuan Mizo hlanga an champion-na hmasa ber tur a ni a, Aizawl FC tan a hlu lehzual ang.