UEFA Awards Kum 10 hnuah Messi & Ronaldo an lang lo

European football a thuneitu sang ber UEFA chuan season hman zawh taka European football a che ṭha, UEFA Men's Player of the Year award dawng thei tur hming pathum a chhawp chhuak a, kum 10 hnua a vawi khat nan Lionel Messi leh Cristiano Ronaldo hming a tel lo. 

UEFA Men's Player of the Year ni thei tur hian Bayern Munich-in treble champion an nih theih nana player thawh hlawk Robert Lewandowski leh goalkeeper Manuel Neuer hming chhawp chhuah a ni a, Manchester City midfielder Kevin De Bruyne hming a tel bawk. 

Coach of the Year chawi-mawina dawng thei tur hming chhawpchhuah a ni bawk a, Bayern Munich boss Hansi Flick, Liverpool manager Jurgen Klopp leh RB Leipzig coach Julian Nagelsmann-te hming chhawpchhuah a ni. 

UEFA hian a vawi khat nan hmeichhe coach ṭha ber an thlang dawn bawk a, he chawimawina dawng thei tur hian Barcelona coach Lluis Cortes, Wolfsburg boss Stephan Lerch leh Lyon manager Jean-Luc Vasseur-te hming chhawp chhuah a ni. 

France football-in football khawvela mimal chawimawina ngaihhlut hlawh bera chhal ngam Ballon d'Or an sem loh tur thu an puan khan Robert Lewandowski-a'n khawngaihtu a ngah hle. 

Polish striker hi Bayern Munich-in treble nomawi an chawi nan a thawh hlawk takzet a, kum 32 mi striker hian season hman zawh takah khan inelna hrang hrangah match 47 khelin goal 55-a khung a, assist vawi 10 a nei thei!

Lewy record enin Neuer leh KDB-te hian chance an nei lo ang deuh thawa sawi theih a ni a, Polish striker hian he chawimawina hi hum haw ngei se a phu bera ngaitu an tam ber ang. 

Chutihrual chuan Bayern-in treble nomawi an chawi nana Lewy hnathawh kan sawi vul dawn a nih chuan Neuer hi sawi hmaih theih a ni bik lo a, kum 34 mi goalkeeper hian Champions league bikah ringawt khan vawi ruk clean sheet a nei thei. 

Premier League aṭanga player lang awmchhun Kevin De Bruyne-a'n season duhawm tak a hmang a, Manchester City midfielder hian PFA Player of the Year chawimawina a lo dawng tawh bawk. 

Kum 29 mi KDB hian Premier League-ah match 35 khelin goal 13 a khung a, assist vawi 20 a nei bawk - Premier League season khata assist ngah ber record chu a nihrual. 

Mahse, Belgian midfielder hian season liam taah khan League Cup tih loh champion nomawi chawi a nei lo a, a elpui Lewy leh Neuer-te lakah chuan nomawi chhuan tur a neih hi a beitham deuh. 

UEFA awards dawngtu hi Ocotber 1-ah puan a ni dawn a, he hunah hian Champions League group stage draw neih a ni nghal dawn bawk a ni. 

Men's Coach of the Year chawimawina dawng thei turin hming pathum chhawpchhuah a ni bawk a, he award dawng tura inel tur Jurgen Klopp, Hansi Flick leh Julian Nagelsmann-te hi award hum haw phu vek an ni. 

Klopp hian Champions League-ah an nomawi humhim thei lo mah se kum 30 hnua a vawi khat nan Premier League-ah Liverpool a champion pui a, anmahni hnaih bertu City aiin point 18 ngawtin an sang fal. 

Kum 55 mi Flick hian November thla khan Bayern enkawl hna ṭan ve chauh mah se he team hi a thlak danglam hlawk tiin a sawi theih a, season a tawp meuh chuan treble champion an ni - award hi dawng pawh ni se awm ti tu an tam zawk hial ang. 

Nagelsmann-a'n a khingpui coach pahnih angin chhuan tur nei lo mah se Bundesliga-ah Leipzig chu pathumna a nihpui a, Champions League semifinal a luhpui bawk - kum 33 mi coach-in budget a neih dan thlir telin a hnathawh ropuizia hrilhfiah hi a awlsam ber. 

UEFA Women's Player of the Year chawimawina dawng thei turin Manchester City right back Lucy Bronze, Chelsea forward Pernille Harder leh Lyon defender Wendie Renard-te chhawpchhuah an ni. 

English defender Bronze hian tunah City tan khel mah se season hmasa khan Lyon hmeichhe team tan a khel a, Champions League, Division 1 Feminine leh Coupe de France feminine-ah te nomawi chawiin treble champion an ni. 

Kum 27 mi Harder pawh hi Chelsea player ni mah se award dawng thei tura a lan chhan erawh season hmasa lama Wolfsburg tana a khelh ṭhat vang a ni a, Danish striker hian German club tan inelna hrang hrangah match 33 khelin goal 38-a khung. 

Lyon captain Renard hi France legend a ni a, Lyon ni lo club dang tan a la khel miah lo - French club-ah hian nomawi 33 zet chawi tawhin season hmasaa treble champion an nih nan player pawimawh a ni.