Player neih kim loh vangin Al Hilal an tla

AFC Champions League nomawi kawl mektu Al Hilal chu an group stage match hnuhnung bera player 11 bak an neih loh avangin inelna aṭanga paihchhuah an ni a, an nomawi an humhim thei dawn lo. 

Kar hmasa khan Al Hilal hi an player 15 chuan Covid-19 an kai tih hmuhchhuah a ni a, hei vang hian khelmuala inlan turin player an ngah tawk lo. 

Saudi Arabia club hian an group stage match tawp berah starting XI-a tel turin player pakua hming chiah an pe lut a, bench-a ṭhu player pahnih chu goalkeeper ve ve an ni. Mahse, AFC danah inelna hmachhawn tur squad-ah hian player 13 tal an awm a ngai a, player 11 chauh nei Al Hilal hi dan angin inelna aṭanga paihchhuahin an awm phah - last 16 lut chiang tawh an ni a, an match tawp ber an khelh theih tak lohah chuan awmzia a awm ta lo a ni. 

Al Hilal hian a tirah chuan an match tawp ber hi a khelh hun sawn mai an dil a, Saudi Arabia Football Federation chuan an dilpui bawk. Mahse, inelna hi Covid-19 vangin rei tak chawlh a lo ni tawh a, AFC chuan inkhelh hun sawn hian inelna chu thui tak a tibuai thei dawn nia ngaiin sawn an remti lo a ni.