I League Fixtures a chhuak Aizawl FC bul ṭanna tur Roundglass Punjab FC

India rama football inelna sang pahnihna I League fixtures chu nimin khan tihchhuah a ni a, January 9 aṭangin Kolkata-ah khelh ṭan a ni dawn. Team 11 khel tur zingah I League ropui laia champion thei Aizawl FC chu club langsar zinga mi an ni a, inelna ṭan ni tlai dar 4:00-ah Roundglass Punjab nen an inhmachhawn ang.

Kumin inelnaa inhmachhawn turte chu Aizawl FC, Chennai City, Churchill Brothers, Gokulam Kerala, Indian Arrows, Mohammedan, Neroca, Punjab FC, Real Kashmir, Sudeva leh Trau te an ni. 

I League Qualifiers champion Mohammedan S.C. hi tun season I League-a team langsar ber tur zinga mi an ni a, Kolkata big three zinga mi hian boruak pawh an nei lian hle.

Mohammedan hian Qualifier champion turin Preliminary Round-ah pakhatna an ni a, Bhawanipore nen an group aṭangin an tlang. Final round-ah pawh Kolkata club pahnih bawk hi an che ṭha a, team pakhat chiah tlang tur a nih avangin Mohammedan an tlang ta zawk. 

Mizo tlangval Vanlalbiaa Chhangte-in Mohammedan hi a tlinpui a tih theih a, Bhawanipore nena an inkhelh ṭumin Hriangtlang tlangval hian goal pawimawh bik a khung.

AIFF-in I League club awm lohna khawpui Delhi, Gangtok, Ranchi, Jaipur, Jodhpur, Mangalore, Bhopal, Lucknow, Kanpur, Ahmedabad leh Calicut aṭangin dilna a thehluh theih an ti a. Delhi club Sudeva FC an in lei tling a, AIFF chuan August 12 khan I League an khelh tur thu hi an puang.

I League club thar pathumna chu a hlui chei ṭhat a tih theih, Roundglass-in Minerva Punjab a lei tak avangin Roundglass Punjab FC tih a ni dawn. Roundglass hian team thuam ṭhat nan sum an sen tam avangin team ṭha ber zinga mi an ni ang.

Covid-19 vangin I League kalphung a danglam dawn a, home leh away a khelh a ni dawn lo. Inelna zawng zawng hi Kolkata-ah khelh a ni ang a, stadium pathum Vivekananda Yuba Bharati Krirangan (Salt Lake Stadium), Kalyani Municipal Stadium leh Kishore Bharati Krirangan te hman a ni dawn.

AIFF Leagues CEO Sunando Dhar chuan "Inelna kalphung thar kan tem dawn a, I League tharah hian team te hi khung hran vek an ni dawn. Player, coach leh official tan tawnhriat thar vek a ni ang. Mipui awm se kan duh a, amaherawhchu boruakin a zir miau loh avangin a theih si lo. Team tinte duhsakna ka hlan e," tiin a sawi.

Team tin hian awmna bik an nei ang a, Covid-19 vangin coach leh player-ten dan zawm tur an nei ang. Inelna tih tawi nan vawi khat an inkhel chhuak ang a, hemi zawh hian a sang parukin champion tur an zawng ang a, a hniam pangain tla tur an zawng thung ang.

Covid-19 vangin Mizoram Premier League khelh theih a ni lo a, Aizawl FC-in Mizo player an duh zawng an thlang thei a ni ber a, chuhpuitu an nei lo. 

Mizo club hian Standly Rozario hoin an khel dawn a, head coach awm loh chhungin Mizo coach ṭha Lalsangzuala Hmar-in a enkawl. AFC hian captain Alfred Jaryan leh defender ṭha Richard Kasagga an chelh bakah Neroca leh Trau tana khel tawh Princewill Emeka an lalut.

RG Stadium-ah Aizawl FC hian training ṭha tak an nei a, inpuahchahna hun ṭha leh ground ṭha an neih avangin inelna I League-ah pawh hian champion tura rinkai zingah an tel thei ang. 

Mizo club hian Roundglass Punjab FC an tum hmasa ber ang a, Kolkata club ṭha Mohammedan Sporting Club erawh round 9-ah chauh hmachhawn dawn. ISL-ah Mohun Bagan leh East Bengal an luhchhoh tak avangin I League tla hniam ta deuh mah se kalphung thar avang leh Mizo club ngei awmna a nih miau avangin Mizo nawlpui zingah chuan ISL ai mahin a la tla na zawk ang.