Mayweather-Pacquiao boruak a lian tual tual

May 2 khian khawvel nghahhlelh Floyd Mayweather leh Manny Pacquiao te an inhnek tawh dawn a, an inhnek tur khawpui Las Vegas-ah ngat phei chuan titi dang a leng meuh tawh lo.

Sum tamna chu

Boxer ropui pahnih inhnek aṭang hian dollar maktaduai 400 hmuhchhuah beisei a ni a, sum hi ticket hralhna leh khawvel pumpuia TV lama pekchhuahna aṭanga lut tura beisei a ni. Mayweather hian he inhnek aṭang hian dollar maktaduai 150 lai hlawh tura beisei a nih laiin Pacquiao hlawh a tlem zawk dawn a, dollar maktaduai 100 a hlawh ang. Inchhuanpui tham chu a la ni tho mai.

Inang lo pahnih

Michigan khawchhuak Mayweather hi a sum leh pai ngah, mi hmaa in pholan nuam ti tak mi a ni. Boxing aṭanga a sum huiluh tawh zawng zawng zat hi dollar maktaduai 400 niin car man to tak tak 98 lai a nei a, pawisa khelhna lamah a inhmang hle bawk.

Boxer hranghlui Muhammad Ali ai meuh pawha ṭha zawk nia insawi Mayweather chuan, "Ali khan 'boxer ropui ber' niin a insawi a, kei erawh 'boxer piang tawh zinga ṭha ber ka ni thung," a ti!

Pacman tia hriat lar Pacquiao erawh pa inngaitlawm, Pathian ṭih mi tak a ni thung. Music lamah a tui in zai pawh a thiam hle nghe nghe. A chawrchhuahna Philippines lamah chuan an atchilh rawn leh ngaihsan rawn a ni a, an ram bial pakhat Sarangani-ah phei chuan congressman a ni nghe nghe. A inhnek aṭanga dollar maktaduai 300 lalut tawh tu hi Philippine senator Sonny Angara chuan, "Manny hi kan entawn ber a ni. A inhnek chuan kan khawlai zawng zawng hi a ruak vek zel a, engkim mai hi a chawl ṭhuap zel a ni," tiin an ngaihsan zia a sawi. Pacman hian 2017 inthlanpuiah Philippines President chuh a tum bawk.

Pacman hian ṭantu pawh a nei hrawl khawp a, amah ṭantu zingah Prince Harry pawh a tel. British lal chhungkua nen hian an inbe ṭha hle a, a fanu panga zinga pakhat chu 'Queen Elizabeth' tiin hming a phuahsak nghe nghe.

A hmuhnawm dawn em?

Boxer pahnih inhnek tur hi khawvelin a nghahhlelh em em rualin a hmuhnawm ring lo an awm ve nual tho mai. A chhan ni bera lang chu Mayweather khelh fimkhur ṭhin lutuk vang a ni ber. Kum 38-a upa boxer hian a khingpuite a 'attack' vak ngai lo a, ring hrulah tlankualin 'counter-attack' a innghat ṭhin a ni. A boxer lo hnek tawh zawng zawng te aia ṭha zawk Pacquiao a hnek dawn vangin a fimkhur lehzual rin a ni a, hei hian inhnek a ti hmuhnawm lo zo vek palh ang tih ṭhenkhat chuan an hlauthawng.

Kum 36-a upa Pacquiao thung hi a chet ran leh hnek ran larpui tu a ni a, mahni lam inveng vak lo a 'open' taka inhnek ṭhin mi a ni. An khelh dan style in ang lo tak avang hian a hmuhnawm phah phian thei bawk.

Ricky Hatton-a ngaihdan

British boxer lar leh thleng sang ber pawl Ricky Hatton hi Mayweather leh Pacquiaote lo inhnek pui ve ve tawhtu a ni.

Kum 2007-a Las Vegas khawpuia Maywweather nen an inhnek ṭuma round 10 naa tlawm Ricky Hatton chuan, "Pacquiao trainer Freddie Roach hi Mayweather hrechiangtu a ni. Mayweather lo inhnek pui tawhtu Oscar de la Hoya trainer hlui a nih avangin a ni tluka Mayweather hrechiangtu hi an awm lo. Pacquiao tan hei hi chance ṭha tak a ni thei," a ti.

Pacquiao nen an inhnek ṭuma round hnihna leka Pacman-a'n a knock out hnu Ricky Hatton chuan, "Mayweather hneh tur chuan kut leh ke che rang nih a ngai a, chutiang mi chu Pacquiao hi a ni. Mahse, an hnek nat dan leh thiam dan en chuan Mayweather hi a chak zawk ka ring a, Pacquiao erawh chak se ka ti zawk thung," tiin kawm nuam leh rilru ṭha tak Pacquiao chu chak tura a duhsak zawk thu a sawi.

Hatton chuan Mayweather kap zui nghalin, "Mayweather hi chuan result ṭha tak a hlawhchhuaha sum a hmuh bawk chuan a duhtawk mai ṭhin. Pacman erawh chutiang mi a ni lo, fan-te tan a inhnek a, a fan-te a dah pawimawh thiam em em. Boxer pahnih hi engtikah emaw an la chawl ve ve dawn a, chutih hunah chuan Mayweather chanchin aiin Pacquiao chanchin hian sawi zui a la hlawh zawk ang. Mayweather hi chu boxing a chawlhsan ruala khawvelin a theihnghilh tur mihring a ni," a ti.