Gurpreet Sandhu-a'n duhtu a ngah

Indian player zinga Europe club tana division sang bera inlan hmasa ber Norwegian club Stebaek goalkeeper Gurpreet Singh Sandhu chuan rimtu a ngah hle.

Norwegian Cup-a a team in Runar 6-0 a an sawp ṭuma inlan Gurpreet chungchang hi sawiin Stebaek sporting director Inge Andre Olsen chuan, "Nitin mai hian hma a sawn a, Europe-a goal keeper ṭha ber pawl a la nih theih kan beisei a ni. India ram aṭangin club ṭhenkhatin loan-a lak min dil nasa em em a, mah se chhuah tir tumna kan nei lo," a ti.

Stebaek goalkeeping coach Espen Granli pawn kum 23-a upa Gurpreet hi a fak hle a, "Eng ram mi nge an nih lamah ka buai ngai lo. Gurpreet kan lakluh chhan chu player ṭha tak la ṭha chho zel thei tur nia kan ngaih vang a ni. Tun ai hian a la ṭha dawn chauh a, ani nena thawhdun hi nuam ka ti hle a ni," a ti.

Omani goalkeeper, Bolton Wanderers leh Wigan Athletic tana khel ṭhin Ali Al-Habsi hmuchhuaktu Granli chuan, "Kan coach Bob Bradley (USA coach hlui) nen kan titi a, Gurpreet hian training naah a khelh ṭhat ṭhin avangin chance a mamawh tih kan sawi hnu in Cup competition-ah khan a inlan ta a ni," tiin Gurpreet chu training na lamah pawh a thawh rim thu a sawi.

Gurpreet hian nikuma India Super League khelh a nih dawn khan club ṭhenkhat sawmna chu a lo hnar tawh a ni.