Chelsea manager Jose Mourinho a boring reng em?

Pathianni zan khan Emirates stadium-ah Chelsea-in an goal veng him turin tlarhnungah an inhnawh khawm a, minute 90 chhung Arsenal lakah an goal an venghim thei. An mamawh point an hmu bawk. Mahse, a naute a khelh tir dan hi mi tam takin an dem a, Arsene Wenger-a pawhin chak tum ngam lo leh dawihzep tiin a sawi zui hial.

Tun hma pawhin hetiang hian sawisel a lo hlawh tawh tho. Inter Milan a enkawl lai kum 2010 Champions League semifinal second leg-ah khan Barcelona nen an inhmachhawn ṭumin a naute chu tlarhnungah a remkhawm tawh bawk. Hemi tum hian ball 24% chauh chang chungin goal khat chauh an chhuah a, fiest leg nen belhkhawmin 3-1 in an chak daih thung.

Kum 52 a upa Portuguse manager hian club pali a enkawl tawh aṭangin champion nomawi 21 zet a chawi tawh a, Chelsea, Real Madrid, Inter Milan leh Porto te chu hlawhtling takin a enkawl tawh a ni.

Mourinho hnuhma 

Porto

Kum 2002-2004 chhung kha Mourinho hian Portugal club Porto hi a enkawl a, kum 2003 khan UEFA Cup-ah a champion pui bakah a kum lehah Champions League-ah a champion pui hial. Primeira Liga ṭum hnih bakah Portuguese Cup leh Portuguese Super Cup vawikhat ve ve a chawipui hman a, champion nomawi paruk lai a chawipui hman.

Chelsea

Porto a a hnuhma ropui tak lo hmu tu Roman Abramovich chuan a club Chelsea enkawl turin kum 2004 khan sum tam tak nen a thlem lut nghal a, Chelsea hi team khawng takah a chher chhuak zui. Premier League-ah vawi hnih champion puiin League Cup-ah vawi hnih a champion bawk a. FA Cup vawikhat a chawi bakah Community Shield vawi khat a chawi bawk. A vawihnih nan a Chelsea a enkawl leh hnuah League Cup vawikhat a chawipui leh tawh bakah Premier League champion nomawi chawi turin an dinhmun a ṭha tawh hle.

Inter Milan

A kalna lam apianga champion nomawi chawi zel ṭhin Mourinho chuan Italy-ah pawh a ze ngai a chhawm lut leh. Inter Milan chu a kum zawnin 2009 leh 2010 khan Serie A-ah a champion pui nghal, Kum 2010 vek hian Italian Cup leh Champions League-ah te champion bawkin treble champion a nih pui. Heng bakah hian kum 2008 khan Italian Super Cup an chawi bawk.

Real Madrid

Pep Guardiola-a'n Barcelona a enkawl a, Barca-in an vanglai an chen mek. Kum 2010 khan Italy aṭangin Mourinho hian Real Madrid a pan a, hetah pawh hian a hna chu tlin takin a tawk tho.

Real Madrid-ah hian an club record lo neih sa tawh chu a rawn khum nghal nual a, season khat chhunga point 96 hmu tling thei te, goal thun hnem ber ṭum te tawngin goal 121 lai an khung bakah khualmuala an chak tam ber ṭum tawngin vawi 16 an chak thei a ni. Mahse, Barcelona vanglai an tawn miau avangin La Liga-ah erawh a champion pui zo chuang lo. Real-ah hian a hlawhchham der a ni lo a, Primera Division, Copa del Rey, Spanish Super Cup-ah te vawikhat ṭheuh a champion tho a ni.

A Champion nomawi chawi tawh zawng zawng te kan thlir chuan Mourinho hi mangaer fing leh ṭha tak pakhat chu a ni kan ti thei ang. Attacking game khel tam lo mah se defensive game khel thiam tiin mi tam tak chuan an sawi ve thung bawk.

A game khelh tir dan hi mi tam takin sawisel mah se a dinna ngaiah a ding tlat a, mi sawiselna chhangin Mourinho chuan, "Team ṭha teh nan chuan ram hrang hranga League tinah hian point hmuh tam zawng aṭangin an teh vek. Hetiang tehna hi kan pawm vek a nih chuan keini hi team ṭha ber kan ni ang, a chhan chu tunah hian point kan hmu sang ber mek a ni. Match khelh zat inanga chak tam hi team ṭha teh nana kan hmang a nih pawhin kan team hi team ṭha ber kan ni tho ang," tiin a sawi.

Chelsea khelh dan a boring tia an sawina chu chhangin Mourinho chuan, "Kan goal thun zat hi chhut teh u, tun season-ah keini aia goal thun tam awmchhun chu Manchester City chauh an ni. Kan goal difference erawh a ṭha ber thung. Keni aia pet goal tlem zawk team 18 an awm a, goal thun tlem hi 'boring' teh nana kan hmang dawn a nih chuan heng team zawng zawng hi keini aiin an boring zawk tihna a ni ang," a ti.

Sawi chhunzawmin Mourinho chuan, "Keini ai chuan Arsenal hi an boring zawk a ni. Fans tan chuan kum 10 chhung zet nomawi chawi lo a awm baka boring a awm chuang dawn em ni? Kan thil nghahlelh em em a lo thlen theih si loh hian a hrehawmin a rei duh em em a, a boring ṭhin zawk a ni," tiin Arsenal a kap let zui bawk.