PSG-in Ibra an chhuah tir a ṭul - Bertrand Demanes

France keeper hlui Jean-Paul Bertrand-Demanes chuan Paris Saint Germain forward Zlatan Ibrahimovic chu lian satliah leh mahni thu duh ve tak a nih avangin club ṭhat zawk nan chhuah tir a ṭul thu a sawi chhuak.

Sweden captain Ibrahi­movic hi PSG midfielder Marco Verratti chuan team tha hrui pawimawh tak a nih thu a lo sawi tawh a, amaherawhchu Nantes keeper hlui hian French midfielder thusawi hi a ṭawmpui lo.

Bertrand Demanes chuan, "Ibrahimovic hi ka ngaihnat zawng a ni lo. A thu a duh em em a, a pawi ber chu mipui hian a fingah an ngai tlat hi a ni. Thing phek pahnih ang lek a ni," tiin a ngaihsan loh thu a sawi.

Kum 62-a upa Ber­trand Demanes chuan sawi zelin, "Luis Suarez leh Lionel Messi te angin Bayern Munich emaw Real Madrid emaw lamah goal khung se, hawi sang se chuan ka hrethiam khawp ang. Nantes laka hattrick siam tan chuan pawr viau chu a fuh lo. PSG hian hmasawn zel an duh chuan chhuah tir rawh se," tiin club tana a ṭangkai loh thu a sawi.

1978 World Cup-a France tana inlan Bertrand Demanes hian Zlatan hi sawi chhe viau mah se record erawh a nei ṭha lawi si. PSG hian kum 1994 hnuah French title an la lawk lo a, kum 2012-a euro maktaduai 20-a AC Milan aṭanga Ibrahimovic an lak hnuah a zawnin ṭum hnih an champion a, tun season-ah champion thei dinhmunah an ding bawk.

Brazil legend Ronaldo chuan Zlatan Ibrahimovic hi Ligue 1 player zinga a duh ber a nih thu a sawi thung. Zlatan hian tun season-ah inelna hrang hrang match 34 khel tawhin goal 28 a khung tawh.