Footballer leh Referee hlui Laldinliana a thi

Mizoram tana senior leh junior team tan inlan tawh Laldinliana chu September 19, 2020-a a lêng chhuak a haw loh hnuah zawn a ni a, nimin khan a ruang hmuh niin nizan khan vui nghal a ni.

Kum 54 mi Laldina hi Mizoram football team-ah Sub Junior, Junior leh Senior team-ah a khel kim vek a, sikul inelna Subroto Cup-ah pawh Mizoram tan a khel tawh. Football a chawlhsan hnuah MFA qualified referee a ni zui bawk.

Football thiam avangin PWD-ah lutin an defender pawimawh a ni a, tualchhunga football inelna lian tham Laldenga Gold Cup leh Independence Day Football-a a champion-pui bakah Chief Minister's Gold Cup, Sikkim-a champion zingah a tel a; Bordoloi Trophy leh NE Fraternity Gold Cup-ah Mizoram tan a lo inlan tawh bawk.

Central YMA Football-a Chaltlang champion puitu zinga mi a ni a, hei bakah hian football a chawlhsan hnuah MFA hnuaia referee ṭha tak a ni zui. Infiamna dangah pawh sulhnu a nei nual a, Mizoram State Games 1985-ah khan Judo-ah telin 50–55 Kg-ah a hold medal a la bawk a ni. Mizoram Football Association chuan thuchhuah siamin footballer leh referee ṭha tak Laldina an ui thu an sawi a, a chhungte a tawrhpui thu tarlangin Pathian thlamuanna a dilsak bawk.