Punjab ngam loh Hyderabad

Thawhṭanni zan dar 8:00 khan India Premier League khelh a ni a, Sunrisers Hyderabad chuan Kings XI Punjab chu run 20-in an hneh.

Punjab Cricket Association Stadium, Mohali-a inkhelah hian mikhual team an tlangnel zawk. Hyderabad-in over 20-ah run 150 vawchhuakin mi paruk an hloh a, captain David Warner chuan ball 41 a hmachhawnah run 58 vawchhuakin a team tan a thawhhlawk viau.

Mual neitu Punjab lamin theihtawp chhuahin an target hi um mah se over 20 khelhah run 130 chiah tlinin mi pakua an hloh a ni. Punjab tana run siam hnem ber Wriddhiman Saha chuan ball 33 a hmachhawnah run 42 vawchhuak mah se a team a chakpui zo lo.

Sunrisers Hyderabad tan New Zealand fast bowler Trent Boult a thawhhlawk a, kum 25-a upa World cup khelh zawh taka New Zealand bowler ṭangkai hian over 4 avawmah run 19 chiah pe in wicket thum a la thei a ni.

Vawiin inkhel tur

Zanin dar 8:00 hian M.Chinnaswamy Stadium, Bangalore-ah Royal Challengers Bangalore leh Rajasthan Royals te an inkhel ang.