Messi aia Ronaldo dah sangtu Ferguson
Manchester United manager ropui Sir Alex Ferguson chuan league zawng zawnga Cristiano Ronaldo a ṭhat theih a rin laiin Lionel Messi erawh a ṭhat vek a ring lo.
Barcelona leh Real Madrid forward-te hian Ballon d'Or hnuhnung pasarih an hui vek. Ronaldo hian tun season-ah goal 50 a khung tling tawh a, Messi khelhna Barca hi La Liga-ah Ronaldo khelhna Real chungah an awm.
Ferguson chuan, "Ronaldo hi a pau khauh hle. Khawvela player ṭha ber chungchangah an inhnial ṭhin a, tam tak chuan Messi hi ṭha zawkah an ngai a, a ngaihdan hi hnial theih a ni lo," a ti zet a.
Scottish manager chuan Ronaldo fak zuiin, "Ronaldo danglamna chu Millwall, QPR, Doncaster Rovers emaw eng club-ah pawh khel se hattrick a siam mai ang. Messi hian a tih ve theih chiah ka ring lo. Ronaldo hian a ke pahnih a hmang thiam a, boruakah a ṭha a, a huai bawk. Messi pawh a huai a, mah se ani chu Barcelona player tura duan a ni," tiin Messi chu club dangah Catalan club tana a theihna ang hi a lantir theih a ring lo.
Sir Alex chuan sawi zelin, "Ronaldo hi Manchester United ka awm chhung zawnga hmasawnna ngah ber a ni. United a zawm tirh khan kum 17 chauha upa a ni a, a la cher em em bawk. Chu chauh pawh a ni lo, tluk der te a chin avangin sawisel a hlawh a, mah se training ṭha a neih hnuah erawh a ropui a ni," tiin Portugal captain a hmuh ṭan tirh dan a sawi.
Ronaldo chungchang sawi zelin United manager hlui chuan, "Player ṭha danglamna chu thutlukna an siam thiam bikna hi a ni. Old Trafford-ah Ronaldo hian hemi chungchangah hian hmasawnna tam tak a nei a, amah bakah Paul Scholes leh Ryan Giggs te hi ka hnuaia player ṭha bik an ni. Bryan Robson, Roy Keane leh Eric Cantona te pawh an ṭha a, mah se heng player pathum hi chu an tluk lo," tiin a sawi.
Bayern Munich leh Germany legend Franz Beckenbauer erawhin United boss hlui ngaihdan hi a ṭawmpui lo niin a lang. Beckenbauer chuan, "Messi hi Pathian ang mai a ni. Barcelona beiseina zawng zawng innghahna chu Messi hi a ni," tiin Argentine forward chu a fak hle.