Premier League Thlirlawkna Champion mai tur 'Chelsea' Vs Tlak hlau 'Leicester'

Manchester United leh Arsenal laka point an hlawhchhuah hnuah Chelsea-in Premier League nomawi an vuan tawh a, an chawi hun tur chiah a la chiang lo.

Zanin dar 12:15 hian Chelsea-in King Power Stadium-ah relegation zone chhuahsan hlim Leicester City an tlawh dawn a, point thum an hlawhchhuak a nih chuan match li dang khelh hmabakah point thum dang chiah an mamawh tawh ang.

Leicester hi a zawnin match li an chak tawh a, an chak loh hnuhnun ber ṭum chu March 21-a Tottenham Hotspurs an hneh loh kha a ni. Chelsea an danglam tam lo, Arsenal an draw hma khan vawi li an chak zawn ve bawk. Tunhnai record aṭang chuan team intluk tawk an ni a, table aṭanga thlir chuan an danglam si, mah se zanin hian Leicester hian an khingpui aiin point thum an mamawh zawk.

Chelsea hian Premier League-a Leicester an hma­chhawn hnuhnung pangaah an chak vek a, Leicester hian kum 1964 hnua a vawi khat nan English league sang berah a zawna vawi nga chak theihna hun ṭha an nei.

Tlar hnung ven thiam Jose Mourinho hote hian Premier League match 191 zinga 103-ah goal an chhuah lo a, match 13 (W9, D4) chhung hneh loh an tawng tawh lo. An hneh loh hnuhnun ber chu Leicester ang thoin Spurs an ni.

Chelsea-in PFA Team of the Year-ah player paruk an thawh a, PFA Player of the Year Eden Hazard an kawl bawk. Arsenal goalkeeper David Ospina nena intauh Brazilian midfielder Oscar a dam tawh a, Diego Costa erawh a kir theih a rinawm lo.

Leicester forward Jamie Vardy-a'n match hnu­hnung pangaah goal thum a khung a, assist vawi hnih a nei. Amaherawhchu Leicester player che ṭha ber pawh thiamna zawnga teh chuan Chelsea bench-ah an ṭhu pha kher lo ang.

Leicester manager Nigel Pearson chuan, "Khelh ṭhat aiin result ṭha neih a pawimawh zawk. Match hnuhnung pali kan chak hi a lawmawm a, tunah chuan season thara Premier League khelh zel a beiseiawm tawh hle. Hmabak tam tak kan la nei a, match 38 zawha a tawp pathum zinga tel loh hi a pawimawh ber chu a ni. Kan supporter-te'n min ṭawiawm ṭha a, kan game hnuhnung lamah minti phur leh zual," tiin a sawi.

Chelsea manager Jose Mourinho chuan Leicester chungchang sawiin, "Player ṭha awmna team an nih avangin tuna an awmna hian min barakhaih hle. Stamford Bridge-ah kan khelh pui tawh a, an theihna chu kan hre chiang hle. Tuna relegation zone an chhuahsan hi a mak lo a, Premier League an khel zel a nih pawhin a mak lo ang. Keini lakah hian point khat emaw point thum emaw an hlawhchhuak thei a nih chuan an tan chuan result ṭha tak a ni ang," tiin an khingpui tur chu a dah hniam lo.