Henry-a'n a hre sual, Giroud hi champion pui tham a ni - Coquelin

Arsenal legend Thierry Henry chuan a club hluiin league title lak an duh chuan striker ṭha an mamawh thu a sawi a, French midfielder Francis Coquelin chuan an striker kawl lai Olivier Giroud chu Gunners champion pui thei player tiin Henry thusawi a chhang let.

Arsenal hian kum 2004 hnuah Premier League nomawi an la chawi leh lo. Hei vang hian manager Arsene Wenger sawi chhe tu an tam a, player ṭha bik an ngah tawk lo chu kum 10 chuang nomawi an chawi loh chhana ngaih a ni.

Kum 23-a upa Coquelin chuan, "Thiery Henry thusawi kha chu a dik lo a ni. Giroud hian kar tinin a theihna a lantir ṭhin. Arsenal striker ni turin a ṭha tawk a, title la thei turin theihna a nei bawk," tiin tun season-a goal 18 khung tawh Giroud a chhan.

Hmabak sawi chhunzawmin Coquelin chuan, "Chelsea nena kan result kha chu a pawi kan ti a, tunah chuan pahnihna ni turin theihtawp kan chhuah zel dawn a, FA Cup champion kan tum bawk ang," tiin a sawi.

Conquelin hian season ṭantirh khan loan-in Charlton a zawm a, December thla khan Arsenal-ah kirin player pawimawh a ni chhunzawm.

French midfielder chuan, "Ka theihnaah hian rinhleh tur ka nei ngai lo a, chance ka nei tam tawk lo mai a ni. Tunah chuan khelhna hun ka nei a, beisei angin thil a kaltluang bawk. Club lianah chuan khel pha turin inel a ngai a, chu chona chu kan hmachhawn ve ngam tur a ni," a ti.