Premier League-ah Bournemouth kan hmu dawn

Thawhṭan zan khan Championship division inkhelah Bournemouth chuan Premier League club hlun ni ṭhin Bolton Wanderers chu Marc Pugh, Matt Ritchie leh Callum Wilson te goal hmangin 3-0 a hnehin Premier League-ah an inhlangkai.

Bournemouth hian game khat chiah khelh tur awm tawhah anmahni hnaih bertu Middlesbrough chu point thumin an tlansan. Bourne­mouth hi Premier League kai tawh anga sawi ni mah se kai loh theih dan an la nei. An game hnuhnung berah 19-0 a an chak loh a, Boro an chak bawk chuan Boro an tlang daih thei. Mahse, hei hi chu thleng thei lo tura ngaih a ni. English division sang paliah eng team mahin goal 13 aia tam an la khung ngai lo.

Tih theih loh ti tu Bournemouth

Bournemouth chairman Jeff Mostyn chuan, "League hniam zawk aṭanga bul ṭanin league sang zawkah kan inhlangkai zel thei a, tunah chuan Premier League kan thleng ta. Vawiina kan thlen chin hi a ropuiin a awihawmloh zawk a, tumahin Premier League kan khelh phak hi an ring lo. Mahse, vawiinah hian tih theihloh kan ti a ni. Thudik tak chu hei hi a ni, season tharah chuan football club ropui tak tak te nen khelmual khatah kan inkhelho ṭhin dawn a ni," tiin a phur hle.

Jeff Mostyn lawmna hi a awmlo hran lo, kum 2008 khan sum leh pai lama an tlakchhiat avangin club hi tihtawp hial an tum hman. Moysten hi club tan a pen chhuak a, a mimal pawisa aṭangin £100,000 thawhin club tluchhe tur a chhanhim. Tunah chuan pound nuai khat leka chhanchhuah theih club khan Premier League an khelh dawn avangin pound maktaduai 100 an dawng dawn!

Bournemouth thluak bur Eddie Howe

Kum 37 leka upa Eddie Howe hian kum ruk chhung chiah football manager hna a thawk. A hnathawh rei lo te chhunga a hlawhtlinna erawh a ropui hle. Kum 2009-10 season khan League two aṭangin League One-ah Bournemouth hi a hlangkai a, kum 2012-2013 season a zawh leh meuh chuan Championship division-ah a team hi a inhlankaipui leh a, tunah chuan Premier League hial a hruai thleng ta.

April 20-a Football League manager of the decade a an thlan Howe chuan, "Kum ruk kal ta kha chuan kan dinhmun a chhe em em a, neih engmah kan nei lo. Kan club ṭantu te'n club chhanhim nan sum an thawh­khawm a ngai hial. He club hi manager leh player ni thei tura hun ṭha min petu a ni. Lawmthu min hrilh ka ngai lo a, kei hi he club ropui tak hnena lawmthu sawi tur zawk ka ni," tiin a inngaitlawm thiam hle.

Bournemouth tana khel ṭhin Howe chuan kum 2011-a an club leitu Russian billionaire Maxim Demin chu a inpeknaah fak a phu thu a sawi bawk.

Players thawhhlawkte

Bournemouth midfielder Matt Ritchie hian Premier League an kai theih nan a thawhhlawk hle a, goal 13 khungin a ṭhiante thun tur vawi 17 a siamsak bawk . English division sang pali zingah Ritchie anga goal a inrawlh hnem an awm lo.

Kum 2014-a Coventry City aṭanga pound maktaduai thuma Bournemouth pantu Callum Wilson pawh hian a thawhhlawk hle. English striker hian tun season-ah Bournemouth tan goal 23 lai a khung a ni.