Goal a sur e...!

Carlo Ancelotti-a'n a lo thlawna sum hman ral a tum lo. League Cup third round khel turin a player neih ṭhat a chhawr nual a, an mikhualna ramah League One club Fleetwood chu 5-2 ngawtin an sawp.

Toffees tan hian forward Richarlison-a'n goal hnih a khung a, Alex Iwobi, Bernard leh Moise Kean ten goal khat ṭheuh an thawh ve bawk. Mualneitu lam tana Mark Duffy leh Callum Camps te goal khungin awmzia a nei phak tawh lo.

Chak chiang viau mah se keeper Jordan Pickford a chesual, a ball pet chhuah fuk tawk lo vangin goal an chhuah a, tun hnaia a khelh ṭhat loh avangin England international hian sawisel a hlawh.

A keeper chhanin Ancelotti chuan, "Goal luh danah mimal mawhpuh tur an awm lo, ball kan in pass kual a, a tawpah Jordan tan hna a harsa tawh a ni. Tlarhnung lama ball inpek kual hi chuan tihsual palh a awm thei," a ti.

Inkhel dangah Premier League club Newcastle United chuan League Two club Morecambe chu 7-0 ngawtin an luhchhuah a, League Cup third round inkhel tawh china insawp nasa ber an ni.

Steve Bruce-a team tan hian Joelinton-a'n goal hnih a khung a, Miguel Almiron, Jacob Murphy, Isaac Hayden leh Jamaal Lascelles ten goal khat ṭheuh an thawh ve bakah Sam Lavelle chuan anmahni lamah a ti lut bawk.

Magpies manager Bruce chuan, "Brighton lakah kan chesual zo chiah a, match kan khelh leh hmasak berah result ṭha kan nei nghal hi ka lawm. Harsatna kan tawh inhnehtir mai loa paltlang theih hi a pawimawh a ni," a ti.