Arteta nauten Foxes an luhchhuah

Arsenal chuan Lei-cester City 2-0 a hnehin Carabao Cup fourth round an lut a, inkhel dangah Everton leh Newcastle United ten club tenau zawk lakah goal surtir chungin round sang zawk an inhlangkai ve bawk.

Nilaini zan King Power Stadium-a inkhelah Foxes defender Christian Fuchs chuan minute 57-naah anmahni lamah a ti goal palh a, hun tawp hma chiahin Gunners striker Eddie Nketiah-a'n chak nemnghehna a khung.

Nizan khan Premier League champion Liverpool leh League One club Lincoln an inhmachhawn a, result kan hre hman lo - a chak zawk chuan Mikel Arteta enkawl Arsenal hi an hmachhawn leh dawn a ni.

Tun kar tawpah Leicester City hian Premier League khel turin Manchester City an mikhual zui dawn a, kar leh Thawhṭanni zanah Arsenal pawh Liverpool khelmualah an lenglut ang - league match pawimawh khelh hmabak an neih avangin League Cup lamah player ṭha an awltir.

Arteta-a'n West Ham hnehtu squad aṭangin player pasarih ngawt a thlak a, rawlthar Bukayo Saka leh keeper Bernd Leno ten inkhel bul an ṭan. Captain Pierre-Emerick Aubameyang chu chawlhtir a nih laiin, midfielder Mesut Ozil leh Matteo Guendouzi tan erawh hmun a awm lo.

Brendan Rodgers pawhin sa huai a ser bik lo. An match hnuhnunga Burnley hnehtu player 11 ngawt a siksawi, season hmasa tawp lama hliam vanga buai James Maddison erawh a bul ṭantu zingah a tel thung.

James Maddison-a'n tun season a match a khelh hmasak berah bul a ṭan fuh, midfield khaikhawmtu niin a hun ṭha neihah erawh goal ban a tih per hlauh. Foxes midfielder hi a dam chiang tawh a, league match lamah pawh player pawimawh a ni chhunzawm ang.

Leicester boss Bren-dan Rodgers chuan, "Kan chak lo ngei mai, mahse ka naute khelh danah khan lawmna tur tam tak a awm. Vanduai vang chauhin goal hnih kan chhuah," tiin an chak loh a pawm thiam thu a sawi.

Maddison chung-chang sawi zawmin Rodgers chuan, "Ngaiawh leh tur chuan hun a la mamawh deuh ang, chutihrualin Arsenal laka a chet dan ang khan a khel chhunzawm a nih ngat chuan kan tan a hlawk thlak khawp ang," a ti.

Player siksawi karah pawh Arsenal player zinga hlawh hnem ber Mesut Ozil hmuh tur a la awm chuang lo, Germany international hlui hi Arsene Wenger chhuah hnuah a zuih hle - Unai Emery leh Arteta ten an hun tir lamah chhawr tum viau mah se an hmang zui duh lo.

Arteta chuan, "Mesut chauh a ni lo, player dang tan pawh chawlhkar harsa tak a ni vek. A zawnin London derby match hnih an khel a, chumi hnuah Foxes kan hmachhawn leh a ni a, taksa bakah rilru a chau hle.

"Player duhsak leh duhsak loh bik an awm lo, match kan khelh tur atana ṭha bera ka ngaihte ka thlang mai ṭhin," a ti. Spanish manager hian tun hmain team tana mi inpe leh ṭhahnem ngai taka khelte chuan inkhelh an phu tih a lo sawi tawh.