Coach te tan training buatsaih

Sports & Youth Services Department chuan ni hnih awh tur Seminar on Sports Medicine and First Aid, Sports Psychology and Method of Training a buatsaih, nimin aṭang khan neih niin vawiinah a tawp ang.

Sports Conference Hall-a hun hmanah hian department coach-te bakah Khelo India State Centre of Excellence (KISCE), district Khelo India Centre (KIC) coach te leh Scouts & Guides, Adventure Wing Staff-te an tel a ni.

Training-ah hian infiammi te performance tih ṭhat dan tur te, hriselna, himna, ei in chungchang leh hmasawnna tur hrang hrang te an zir ho ang. Resource persons atan Dr. C. Zonunsanga, SRH-ZMC, Falkawn; Pi VL Muanpuii, MHSSP, NHM leh Dr. C. Lalfakzuali, Mizoram University te sawm an ni.

Department hnuaia coach te hian Mizo ṭhalai te engemawzat training an pe tawh a, international leh national level infiammi langsar tak tak te an lo chher chhuak tawh bawk.

Sports Department hian an minister Lalnghinglova Hmar hmalakna hnuaiah Vision Olympics 2036 nei mekin Talent Identification, Village Level Coaching leh infiammite dawmkanna tur chi hrang hrang Public Private-Partnership hmangin a ngaihtuah mek. Tunhnaiah khan Incentive Cash Award for Meritorious Sportspersons semna neiin mi 416 in lawmpuina an la a ni.