Germany tan mi thar Leweling

Nations League-ah Germany-in an elpui Netherlands chu Jamie Leweling goal hmangin 1-0 in an hneh a, match hnih khelh hmabak la nei chungin League A group 3 aṭangin quarterfinal an lut. Julian Nagelsmann-a hote hian November thla hian Bosnia and Herzegovina leh Hungary an hmachhawn leh ang.

Germany leh Netherlands te hi an intawn hmasak ṭumin 2-2 in an inhnehtawk a, tun ṭumah hian Oranje-in hrem vanga Virgil van Dijk awm loh an tuar hle. Allianz Arena-a inkhelah mual neituin bul an ṭan ṭha a, Leweling-a'n minute hnihna lekah goal khung nghal mah se VAR hmanga ennawn hnuah pawm a ni lo.

Nagelsmann-a hoten inkhel an thunun zawk a, goal chance pawh an ngah. Minute 64-naah Stuttgart forward Leweling-a'n corner aṭanga ball kal clear ṭhat tawk loh chu kawh zetin an pet goal.

Netherlands tan Xavi Simons-a'n crossbar pet per ve bawk mah se inkhel thununtu Germany-in an phu angin hnehna an chang. Kum 23 mi Leweling hi Jamal Musiala inhliam vanga koh chawp leh a ni a, ram tana a khelh hmasak bera goal a khung nghal avangin an koh chhoh zel pawh a rinawm hle.

Kumin Nations League-ah kalphung an thlak hret a, group stage zawhah semifinal ni nghal loin quarterfinal aṭangin a inṭan tawh dawn. League A-ah hian team 16 chu group paliah ṭhen an ni a, group tin aṭangin a sang pahnihin knockout stage an lut dawn a, Germany hi quarterfinal lut hmasa ber an ni.