Italy tan Daniel Maldini

Daniel Maldini chuan Thawhṭan zan khan Italy tan Nations League a khel a, Maldini thlah kal zelah Azzurri tana inlan thei pathumna a ni - a pa leh a pu hnung a zui tihna a ni.

Daniel-a pa Paolo Maldini chuan a fapa inkhel lai hi a en a, ram tana vawi 126 inlan thei tan a fapa inkhel chu a hmuhnawm ang - Daniel-a pu Cesare Maldini pawh Italy tan hian vawi 14 a lo inlan ve bawk.

Kum 23 mi Daniel hi tunah chuan Monza attacking midfielder a ni mek, a hmain a pa leh a pu ang bawkin AC Milan tan pawh a lo khel tawh, ram tana a inlanna hmasa berah hian Israel a hmachhawn a, hun tawp hma minute 16 la awmah Giacomo Raspadori a thlak.

Maldini Jr chuan, "Thil nuam leh hlimawm, a ṭha lam zawng tawn hi chu a nuam. Ka chhungten ka inkhel min en theih avangin ka lawm bawk," tiin Italy tan a inlan ve thei chu a lawm hle.

Inkhelah hian Italy hian an khingpui Israel hi 4-1 in an hneh. Azzurri tan Giovanni di Lorenzo chuan goal hnih khungin Mateo Retegui leh Davide Frattesi ten goal khat ve ve an khung a, mikhual goal neih chhun hi Mohamed Abu Fani khung a ni thung.

Israel hian an ram buaina vangin anmahni ramah match an khel thei ngai lo a, ram dang an tlawh dawn pawhin harsatna an tawk ṭhin, an match tam ber chu Hungary-ah an khel mai ṭhin a ni. Italy an lenchilh hi kumin atan Hungary ni lo ram danga an inkhelhna hmasa ber a ni hial.