Ten Hag hoin training an chhunzawm

Manchester United chuan an manager Erik ten Hag hoin Thawhṭanni khan training an chhunzawm a, tun hnaiah ban mai theih tur anga thawm a rik avangin khawthlang chanchinbu mite chuan Ten Hag chungchang hi an ngaihven hle.

Dutch manager hian beisei angin a naute a kaihruai ṭha rih lo. Premier League season bul an ṭan fuh lo hle a, Tottenham lakah 3-0 ngawta an mualpho bakah tun hnai khan FC Porto leh Aston Villa te nen an inhnehtawk.

Man United thuneitute hi thla tin an inhmukhawm ziah, kar hmasa Thawhlehni pawh khan Sir Jim Ratcliffe hoin darkar ruk chhung zet an ṭhukhawm a, an thu leh hla erawh engmah puanzar a ni lo thung.

Premier League match sarih an khelh tawh chinah Manchester United hian point riat chauh an la hmu a, team 20 inel zingah 14-na an ni, hmahruaitu Liverpool (18 points) aiin a mawngphah Wolves (1 points) an hnaih zawk!

An dinhmunah hian Man United thuenitu lam an lungawi lo tih chu phat theih a ni lo. Mahse, nipui lai mai khan contract thar an ziahpui a ni a, hun rei lote hnuah ban leh ngawt chu thil awlsam niin a lang lo.

Tun kar tawp hian EPL khel turin Brentford an mikhual dawn, chumi hnuah Europe League khel turin Istanbul-ah Fenerbahce an hmachhawn ang - Turkish club hi Jose Mourinho enkawl lai an ni.