Duhtak Jurgen, Juda kan tih che a ngai dawn maw?

Borussia Dortmund ṭantuten Jurgen Klopp an âtchilh dan chu pui tak a ni - an club vanglai an sawi dawn apiangin, "Klopp-a kan coach a nih lai chuan maw..." tiin bul an ṭan a, German coach hi an tan chuan chhandamtu a ni.

Liverpool a kal hnuah pawh Jurgen an ngainatna a kiam lo - Bundesliga-a an elpui an ni miau lo a! He German coach hian a theihna leh thiamna piah lamah mipui rilru hneh theihna danglam bik a nei hrim hrim a, Liverpool fan-te pawhin an âtchilh rawn a tling.

"Thathona reng ka nei ta lo..." tia Liverpool chhuahsantu hian tun hnaiah hna thar a nei a, coach angin a ni dawn lo. Red Bull-ah head of global soccer a ni dawn a, Austrian energy drinks brand lar tak hnuaia football club-te thurawn a pe ṭhin dawn.

Hei tak hi Dortmund tana nâ chu a ni - Red Bull club zingah Dortmund elpui RB Leipzig an tel a, Dortmund hian he club hi an elpui a ni satliah lo a, an club football kalphung avanga German football ngainautena an huat rawn a ni.

Huat rawn a?

Klopp hian January aṭangin Red Bull-ah a hna hi a thawk ṭan dawn a, Dortmund hmelma Leipzig-ah coach ni lo mah se, a thurawn mila kal tur an nih miau avangin a inrawlh thuk ang tih a chiang a, hei hi Dortmund tan a lawmawm lo.

Leipzig hi German football ngainatuten an huat chhan pakhat a awm. German Football Association (DFB) dan hnuaiah chuan German club-te chu '50+1' rule hmang ngei tura beisei an ni a, chumi awmzia chu German club-ah ram pawn lam miin 49% share aia sang an nei thei lo.

'50+1' rule dan hnuaiah share tam tak hi fan-te ta a ni tlangpui a, club ticket leh thil hrang hrangah fans-in aw an nei ring hle. Mahse, Leipzig hian '50+1' rule-ah hian a kaw lai an hmu - club member 17 chiah an nei a, hei hi Dortmund-a share nei fans 1,70,000 nen chuan inthlau tak a ni.

Leipzig club member 17 hi Red Bull nena inkungkaihna nei deuh vek an ni lehnghal! '50+1' rule zawm ve tho siin, Leipzig hian dan famkim tawk lohna hmang remchangin, 100% thuneihna club-ah hian an nei tihna a ni a, hei hi German football fan-ten an haw takzet.

A bul ṭanna

Red Bull hian kalphung danglam tak an nei a, club lar sa emaw hlawhtling sa emaw an lei ve ngai lo. German football pawh hi kum 2009 khan an luhchilh ṭan ve chiah a, hetihlaia fifth-division club SSV Markranstadt chu leiin, kum riat chhunga top flight league club-a an siam tur thu an sawi.

Kum 2016 a herchhuah meuh chuan Leipzig hian Bundesliga an khel tawh! Club an ṭhang chak a, German football fan-te lung erawh a dam thei lo. Club hming ni se, sponsor tu hminga phuah phal loh tih chu thiam taka her remin RasenBallsport Leipzig an inti a, Red Bull lam tawi RB awm telin, RB Leipzig an ni ta tho!

Leipzig hi, "Germany football-a club huat hlawh ber" tih hialin hming an pe a, an elpui fan-ten an inkhelh apiangin an tihelna vawi tam hmuh tur a awm. Kum 2017 phei kha chuan Dortmund fan-te hian Leipzig ṭantute chu thil chi hrang hranga an vawm avangin Dortmund ṭantu 28 lai man an ni.

Dortmund club thuneitute pawhin ualau takin Leipzig an duh lohna hi an lo au pui fo tawh a, tuna an club duh loh ber lam hawia an coach ngaihsan em emin a ngaihtuahna a seng tur hi an ngaithiam lo a ni ber - dem theih an ni lo.

Thawnthu hlui

Klopp ngei pawh hi RB Leipzig kalphung lo sawisel tawhtu a ni a, khawtuala zungkaih thuk tak nei lo club, sumdawng lianin an enkawl hmanga an vulh len ringawtte chuan a lung an len ve ngai loh thu a sawi tawh.

German coach hian, "Kei chu football zuna uai ka ni a, football hi chu mipuite nen hian nghet takin inkungkaih tlat se ka duh. Germany-ah chuan club pahnih chauhin, 'You'll never walk alone' tih hla ropui tak hi an sa ṭhin a, chu chu Mainz leh Dortmund an ni," a ti.

Klopp-a'n ṭawngkam a lo neih tawh dan thlenga thlir chuan, Dortmund fan-ten a thutlukna an la na hi a awm lo hran lo. German chanchinbu lar Bild-a head of football Christian Falk chuan Klopp-a thutlukna chuan Germany-a mipui tam tak a ṭhawn thu a sawi a, hetihrual hian Klopp a chhan.

Falk chuan, "May aṭang tawh khan an inbiakna hi ka thlithlai reng a, Jurgen hian rei tak chu a ngaihtuah a, tih a duh chiah lo. Mahse, Liverpool a enkawl angin hah taka hnathawh a ngai lo a, ni tin inkhel en a ngai hek lo," a ti a, Klopp chuan hahdam paha thawh atan Red Bull sawmna a pawm niin a sawi.

A dik alawm

Falk chuan, "Klopp-a'n Leipzig a zawm hi fans tam tak chuan pawm harsa an ti ngei a, Germany-a fans tam tak chuan, 'Klopp hian a thinlung a phatsan ta mai em ni?' an ti hial a, an awih thei lo a ni ber.

"Mahse, kei chuan Klopp hi ka dem lo. Leipzig hi chu club lian tak an ni a, hnar an har. A bik takin Dortmund fans tan chuan pai dam a harsa ang tih ka hrethiam a, club pahnih inkara boruak a awm reng avang pawhin awm ka ti hle.

"Thuneitu pakhat hnuaia club awm ve mai, tiin an sawi fo a, mahse, rei lotêah Klopp-a chunga an lungawi lohna hi chu a reh ve mai ang. Germany-ah chuan Jurgen Klopp hi an ngaisang em em a, a duh duh a tithei a ni," a ti!

Bild-a football lam hotupa Falk hian fan-te chuan Klopp hi an huat rei theih a ring lo a ni ber a, German football fan-ten Liverpool coach hi an ngei rei theih a ring lo.

Huatna chu

Mahse, 2008-2015 inkara Dortmund a enkawl laia âtchilhtu fans tam tak tan Klopp-a thutlukna hi a na thlawt - twitter-a ziaktu pakhat chuan, "Engtin nge second khat lek chhungin a hmingṭhatna zawng zawng chu a thai reh theih zawk?" a ti hial a, Klopp a dem.

Pakhat chuan, "Dortmund-ah chuan Klopp chu kan thlah fel thei ta," tiin a ziak a, an club coach ropui chu theihnghilh a duh - ṭhenkhatin pharisai an ti a, ṭhenkhatin sum duh luata khaw hmu loah an chhuah bawk!

Hmangaihte inkarah chuan hetiang hi a thleng chawk a ni lawm ni? Hetihlai hian, "Thathona reng ka nei tawh lo," tia Liverpool a chhuahsan dawna a thusawi chu fans ṭhenkhatin amah tihel nan an hmang a, "Red Bull in tur a nei tawh dawn a, a thatho reng tawh ang chu," an ti!

Hetihlai hian Dortmund-a rei tak chief executive lo ni tawh, Klopp-a thawhpui ṭhin Hans-Joachim Watzke chuan, "Jurgen hi a hna tharah hlawhtling turin duhsakna ka hlan. He hna chungchang hi kan sawi dun tawh a, kei chu min ṭhawng lem lo," a ti a, a ṭhianpa a chhan.

Germany fapa!

Klopp hi Germany-ah chuan Dortmund fans chauh lo pawhin an ngaisang vek a, âtchilhtu a ngah hle - Germany national team enkawl turin an duh a, 2026 World Cup-a coach ni lai Julian Nagelsmann-a'n a contract a hman zawh huna Germany coach tura duhtu pawh an tam hle.

Hei vang hi a ni mai thei - Klopp hian Red Bull nena an inremnaah hian, a team duhzawng takin an dawr a nih chuan a chhuah theihna dan tur a ziak tel niin an sawi. German legend Lothar Matthaus chuan, "Red Bull hian thil ropui tak tih an tum a, Jurgen Klopp pawh mi ropui a ni a, an inhmeh hle," a ti.

Matthaus chuan sawi zawmin, "Red Bull hian a zawng zawngin an thlawp ang tih a chiang a, an hnathawh dan tur hmuh a châkawm tawh hle. Mahse, hetah hian a tawp mai loh ka beisei a, coaching hna thawk tura a lo kir leh ka beisei a ni," a ti.

Ni e, Jurgen - dawhkan phena hna thawk a, kan hmuh phak loh khawvela football buaipui tur chuan i pamhmai lua e! Lo kir leh ngei la, khelmualah 'heavy metal football' min hlui leh ngei ang che.