National Weightlifting C'ship : Mizoram aiawhte youth inelnaah an che ṭha

IWLF Youth, Junior leh Senior National Weightlifting Championships chu October 6-13, 2024 chhung khan Himachal Pradesh, Nagrota Bagwan-ah neih a ni a, Mizoramin youth inelnaah gold, silver leh bronze medal pakhat ṭheuh an la.

Inelna hi category pathum youth, junior leh senior-ah ṭhenhran a ni a; junior-ah Mizoram aiawhten silver medal pahnih lain senior-ah medal an hlawh chhuak lo. Chutihrualin senior-ah hian Services aiawha tel Mizo tlangval Lalhunthara 73 kg leh Jeremy Lalrinnunga'n 67 kg ten silver leh bronze an hlawh chhuak thung.

Jeremy hi Commonwealth Games-a a kawng leh kiuah hliam a neih avangin ngai a la awh lo a, kum khat dawn chawl tawhin a inenkawl chho mek a, a theihna zawng zawnga a chawi hi a la rem lo.

Record thar

Mizo tana chanchin lawmawm chu Lalruatfela'n clean & jerk-ah 174 kg chawiin national record thar a siam. Kumin September thla khan Ruatfela hian Fiji-a inelna neih Commonwealth Weightlifting Championship Junior-ah silver medal a chawi chhuak a, khami ]um khan clean & jerk-ah 166 kg a chawi a, hun rei lote chhungin a hmasawnna a hmuh theih.

Bungzung tlangval Ruatfela hi MSSC Weightlifting Academy, Ramhlun Sports Complex aṭanga inzir chhuak a, tunah hian National Centre of Excellence, Patiala-ah a awm mek.

Gold pakhat

Mizoram tana gold medal la awmchhun Laithanpuia hi Sairang Dinthar mi a ni a, Mizoram State Sports Council (MSSC) hnuaia weightlifting zirlai a ni a, coach Zohmangaihna kaihhruaina hnuaiah a inzir mek. Laithangpuia chungah hian Mizoram Weightlifting Association (MWA) secretary Malsawma Khiangte pawhin beisei a nei sang hle.

Mizoram aiawh hian lifter 12 an tel a; coach K. Zonunsanga, assistant coach Lalremruata leh manager Narayan Lama ten an ho a ni.