Mizoram State Level Red Run 2024 a hlawhtling

Nimin khan MSACS buatsaihin Mizoram State Level Red Run 2024 neih a ni a, Mizo basektball player langsar Lalrina Renthlei-in intlansiak hi a vai liam. City Park, Aizawl aṭangin an tlan ṭan a, Bawngkawnah va kualin City Park-ah an let leh a, an tlan thui zawng hi 10km vela ngaih a ni.

Mipa leh hmeichhe inelnaah Pachhunga University College zirlai Lalhmunmawia leh H. Ngolaso te chu pakhatna an ni a, Rs 15,000 ve ve an dawng. Red Run hi Red Ribbon Club member-te tana buatsaih a ni a, tun dinhmunah Mizoramah Red Ribbon Club hi zirna in 45-ah a ding mek a, college zirlaiten HIV leh drugs hmansual chungchang zirtirna an dawn theihna tura pawl din a ni.

August leh September, 2024 chhung khan District hrang hrangah District level Red Run neih a lo ni tawh a, district level-a tiṭha zual te hi State level Red Run-ah hian an tel bawk.

Mizoram State level Red Run 2024-ah hian College zirlai 280 bawr vel an tlan a, tun ṭuma thupui atan hian 'Run for Health, Run for HIV awareness' tih hman a ni. HIV laka fihlim zel tur leh HIV dona kawnga hma la zel tura intiamna 'Signature campaign' neih nghal a ni.