Mellung phuntu Swiatek

Hmeichhe tennis thuneitu sang Women's Tennis Association (WTA) chuan world ranking thar an ti chhuak leh ta, a chung berah Iga Swiatek chu awmin, mi dangten an la tih theih zen zen loh thil a ti ta.

Poland nula Swiatek hi number 1 a nih hun chhung rei zawng belhkhawm chu chawlhkar 125 a tling tawh a, hmeichhe player awm tawh zingah a zawna chawlhkar 50 chhung vawi khat aia tam number 1 dinhmun chelh thei pasarihna a ni.

Kum 1975 November 3 aṭangin WTA ranking hi mumal taka tih chhuah niin, tun hma chuan player ropui tak tak - Chris Evert, Martina Navratilova, Steffi Graf, Monica Seles, Martina Hingis leh Serena Williams te chuan an lo ti thei tawh a, tunah Swiatek a rawn lang ve ta chiah a ni.

Tun hnaiah erawh Swiatek hi a inkhel rih lo, mimal harsatna avangin China rama inelna a hmachawn lo a, hei vang hian world ranking point a hmuh belh lo, a dinhmun pawh a him lo lek lek tawh a ni.

World number 1 Swaitek hian point 9785 a hmu a, amah hnaih bertu Aryna Sabalenka chuan point 9716 a hmu thung, player pahnih inkarah point 69 chauh a awm tawh, tournament pakhat lekah an dinhmun a danglam thei tawh ang.

Hmeichhe tennis season a zo hnai a, inelna hmachhawn tur erawh a tam tawh lo. Chutihrualin, Japan leh China-ah inelna a la awm dawn, chumi hnuah a thiam zual pariat inelna WTA Finals an la hmabak bawk a ni.