Ukraine tan Kalyuzhnyi a inlan zel

2022-23 season-a Indian Super League club Kerala Blasters tana inlan Ivan Kalyuzhnyi chu Ukraine tan a vawi hnih nan a inlan a, Thawhṭanni zan khan UEFA Nations League-a Czech Republic nena an inkhelah an ram team tan hian bench aṭangin a lut - ram tana match hnih a khelhna chiah a ni.

Ukraine-in an ram buaina avangin Poland lamah an home match an khelh a la ngai zel a, Thawhṭanni zanah pawh Wrocław Stadium-ah Czech Republic hi an mikhual - mikhual team hian minute 18-naah Lukáš Červ hmangin goal hmahruai an khung a, 1-0 a ni.

Mahse, Ukraine hian minute 52-naah penalty hlawh chhuakin, hei hi AS Roma striker Artem Dovbyk chuan goal-ah a chantir a, goal dang lut loin team pahnih an inhnehtawk. Ukraine tana goal awmchhun khungtu Dovbyk hi season hmasa khan Girona tan inlanin, match 39-ah goal 24 ngawt a khung.

Nipui lai khan euro maktaduai 38-in Roma a pan zui a, Serie A club tan match kuaah goal li khungin, assist vawi khat a nei tawh. Thawhṭanni zan inkhelah hian Kaliuzhnyi chu minute 64-naah luhtir a ni bawk a, captain Taras Stepanenko a thlak.

Kum 26 mi Kalyuzhnyi hian 2022-23 season kha Blasters-ah loan-in a khel a, an ram club FC Oleksandriya aṭangin South Indian club hi a zawm - ISL a khelh laiin inelna hrang hrangah match 19 a khel hman a, goal li khungin assist vawi khat a nei.

Season khat hnuah an ramah kirin, a club nghet sa Oleksandriya tan a khel leh a, ram tan hial a inlan ta. Tun international break hi Ukraine squad-a a tel hmasak ber a ni a, kar hmasa khan 1-0 a Georgia an hnehna inkhelah inlanin, ram tana a match hmasa berah hian bul a ṭan.